Read De Bibel JHF Psalm 143 Bible Online

Psalm 143 - De Bibel JHF bible

Psalm 143

¹Een Psalm. Von David. Har! Hea mien Jebäd, nemm too Uaren miene Bedd; erhia mie en diene Tru, en diene Jerajchtichkjeit!

²Un go nich em Jerecht met dienem Kjnajcht! Dan ver die es kjeen Läwendja jerajcht.

³Dan de Fient vefolcht miene Seel, klunjt mien Läwen enne Ieed, lat mie wonen en Diestanis aus de Doodes de oole Tieden.

⁴Un mien Jeist woat meed en mie, mien Hoat es beteibt en mienem Ennalichen.

⁵Ekj denkj aun de Doag de oole Tieden, ekj äwalaj aul dien Doonen; ekj denkj äwa daut Woakj von diene Henj.

⁶No die breed ekj miene Henj ut; aus een drieejet Launt darscht miene Seel no die. (Sela)

⁷Erhia mie boolt, Har! Mien Jeist veschmacht. Vestäakj dien Aunjesecht nich ver mie! Sest woa ekj soo aus dee sennen, dee rauf enne Kul foaren.

⁸Lot mie zemorjes hieren diene Jnod, dan opp die vetru ekj; wies mie däm Wajch, däm ekj waundlen saul, dan no die erhäw ekj miene Seel!

⁹Rad mie, Har, von miene Fiend! No die näm ekj miene Tooflucht.

¹⁰Lia mie dien Wooljefaulen to doonen! Dan du best mien Gott; dien gooda Jeist leid mie opp jlikjem Launt!

¹¹Om dienen Nomen wellen, Har, beläw mie; en diene Jerajchtichkjeit leid miene Seel ut de Bedrenkjnis!

¹²Un en diene Jnod vetilj miene Fiend, un de Bedrenja von miene Seel brinj om! Dan ekj sie dien Kjnajcht.