Read De Bibel JHF Psalm 144 Bible Online

Psalm 144 - De Bibel JHF bible

Psalm 144

¹Von David. Jesäajent es de Har, mien Fels, dee miene Henj lieet too Kjamfen, miene Finjasch toom Kjrich:

²Miene Jnod un miene Burjch, miene huage Fastinj un mien Rada; mien Schild un dee, opp däm ekj vetru, dee mie mien Volkj unjadon moakt!

³Har, waut es de Mensch, daut du von am Kjantnis nemst, de Sän de Menschen, daut du am beachst?

⁴De Mensch es aus de Odem; siene Doag sent aus een vebie gonenda Schauten.

⁵Har, neij diene Himmel un foa rauf; rea de Boaj aun, daut see rieekjren!

⁶Blitz met Blitzen un vestrei dee; scheet diene Feilasch un vewerr an!

⁷Strakj diene Haunt von Bowen ut; riet mie rut un rad mie ut dee groote Wotasch, ut de Haunt de Säns de Framde,

⁸dee äa Mul Läajes räd, un dee äa Rajcht een Rajcht von Läajes es!

⁹Gott! Een nieet Leet well ekj die sinjen, met de 10-seidje Hoap well ekj die Psalmen sinjen;

¹⁰die, dee Radunk de Kjennichs jeft, dee sienem Kjnajcht David vom beesen Schwieet rad.

¹¹Riet mie rut un rad mie ut de Haunt de Säns de Framde, dee äa Mul Faulschheit räd, un dee äare Rajchte een Rajcht de Läajes es;

¹²Daut onse Säns en äare Jugent sent aus groot jewossne Plaunten, onse Dajchta aus behakte Akjfeilasch no de Buoat von eenem Paulaust;

¹³daut onse Spikjasch voll sent, von aulalei Oat - Väarot; daut ons Kjlienvee 1000-fach sikj vemieet, 10 000-fach opp onse Stapen;

¹⁴daut onse Rinda droagend sent; ([aundre Äwasatinj; daut onse Ossen väl oabeiden;]) daut kjeen enbräakjen un kjeen Utfaul es un kjeen kloag Jeschrecht opp onse Gaussen!

¹⁵Jlekjseelich daut Volkj, däm aulsoo es! Jlekjseelich daut Volkj, dän äa Gott de Har es!