Read De Bibel JHF Psalm 145 Bible Online

Psalm 145 - De Bibel JHF bible

Psalm 145

¹Een Loffjesank. Von David. Ekj well die erhäwen, mien Gott, du Kjennich, un dienem Nomen emma un eewich veharlichen.

²Jieda Dach well ekj die danken, un dienem Nomen emma un eewich lowen.

³Groot es de Har un sea too lowen, un siene Huachheit es onerforschlich.

⁴Een Jeschlajcht woat däm aundren diene Woakjen riemen, un diene majchtje Woakjen woaren see vekjindjen.

⁵Ekj well von de harliche Pracht diene Majestät räden un von diene Wundawoakjen.

⁶Un see woaren von de Krauft diene furchtboare Doten räden, un diene groote Doten woa ekj vetalen.

⁷Daut Jedajchnis von diene groote Leew woaren see väaschtreeme loten, un diene Jerajchtichkjeit bejublen.

⁸Jnädich un boarmhoatich es de Har, langsom toom Oaja un groot aun Jnod.

⁹De Har es jäajen aule goot, un siene Erboarmungen sent äwa aule siene Woakjen.

¹⁰Daut woaren die lowen, Har, aule diene Woakjen, un diene Fromme die veharlichen.

¹¹See woaren von de Harlichkjeit en dienem Kjennichtum räden un von diene Macht räden,

¹²om de Menschenkjinja weeten to loten siene majchtje Doten un de prachtvolle Harlichkjeit von sienem Kjennichrikj.

¹³Dien Rikj es een Rikj von aule Tieden, un diene Harschoft derch aule Jeschlajchta.

¹⁴De Har stett aule Faulennde un recht opp aule Doljedrekjte.

¹⁵Aule Uagen luaren opp die, un du jefst an äa Äten to siene Tiet;

¹⁶du deist diene Haunt op un moakst aulet Läwendje met Jnod saut {5Mo.33,23}.

¹⁷De Har es en aul siene Wäaj jerajcht un jnädich en aul siene Woakjen.

¹⁸Dichtbie es de Har aule, dee am aunroopen, aule, dee am en Woarheit aunroopen.

¹⁹Hee deit dee äa Velangen, dee am enjsten; äa Schrieen hieet hee un rad an.

²⁰De Har bewoat aule, dee am leewen, un aule Gottloose vetilcht hee.

²¹Mien Mul saul däm Loff Gottes vekjindjen; un aulet Fleesch low sienen heiljen Nomen emma un eewich!