Read De Bibel JHF Psalm 147 Bible Online

Psalm 147 - De Bibel JHF bible

Psalm 147

¹Loft däm Harn! Dan daut es goot, onsem Gott too besinjen; dan daut es leeftolich, daut jeziemt sikj Loffjesank.

²De Har but Jerusalem, de Vejoagte Israels saumelt hee.

³Dee doa heelt, dee jebroaknen Hoates sent, un äare Wunden vebinjt;

⁴dee doa talt de Zol de Stierns, dee aule nant met Nomen.

⁵Groot es ons Har, un rikj aun Krauft; siene Ensecht haft kjeene Mot.

⁶De Har helt de Älendje opprajcht; hee drekjt de Gottloose bat aune Ieed.

⁷Stemmt däm Harn een Dankleet aun, sinjt Psalmen onsem Gott met de Hoap!

⁸Am, dee de Himmel met Wolkjen bedakjt, dee Räajen fa de Ieed reed moakt, dee Grauss opp de Boaj waussen lat;

⁹dee däm Vee sien Fooda jeft, de junge Kraujen, dee doa roopen.

¹⁰Hee haft nich Lost aun de Pieed äare Krauft, noch Jefaulen aun däm Maun siene Been.

¹¹De Har haft Jefaulen aun dän, dee am enjsten, aun dän, dee opp siene Jnod hopen.

¹²Riem, Jerusalem, däm Harn! Low Zion, dienen Gott!

¹³Dan hee haft de Dooarijel faust jemoakt, haft diene Kjinja jesäajent en diene Medd;

¹⁴hee, dee en diene Jrensen Fräd jeft, die saut moakt met däm Fat vom Weit;

¹⁵dee sienen Befäl opp de Ieed schekjt: Sea schwind rant sien Wuat;

¹⁶dee Schnee jeft aus Woll, Riep aus Ausch streit;

¹⁷dee sien Ies schmitt aus Brocken: Wäa kaun bestonen ver sienem Frost?

¹⁸Hee schekjt sien Wuat un see schmelten; hee lat sien Wint blosen: Daut rant daut Wota.

¹⁹Hee vekjindicht Jakob sien Wuat, Israel siene Sazungen un siene Rajchte.

²⁰Kjeenem Volkj haft hee aulsoo jedonen; un de Rajchte, see ha dee nich jekjant. Loft däm Harn!