Read De Bibel JHF Psalm 16 Bible Online

Psalm 16 - De Bibel JHF bible

Psalm 16

¹Een Miktam (Jedicht) von David. Bewoa mie, Gott, dan ekj sieekj Tooflucht en (bie) die!

²Du, miene Seel, hast toom Harn jesajcht: Du best mien (dee) Har; daut jeft kjeen Jlekj fa mie buta die.

³Du hast to de Heilje jesajcht, dee oppe Ieed (em Launt) sent, un to de Harliche: Aun an es aul miene Lost (Wooljefaulen).

⁴Väle woaren de Weedoag dee äare sennen, dee eenem aundren nogonen; äare Drinkjopfa von Bloot woa ekj nich droagen, un äaren Nomen nich opp miene Leppen nämen.

⁵De Har es daut Deel von mienem Oawgoot un mien Kuffel; du helst mien Loss.

⁶De Motschnua sent mie jefollen en leeftolje Uaten; jo, een scheenet Oawgoot es mie jeworden.

⁷Däm Har woa ekj danken, dee mie beroden haft, uk de Nacht belieren mie miene Nieren.

⁸Ekj ha däm Harn emma ver mie jestalt; wiels hee aun (too) miene Rajchte es, ekj woa nich wanken.

⁹Doarom freit sikj mien Hoat, un miene Seel (Iea) es froo (jubelt) {Ps.7,6; Ap.J.2,26}. Uk mien Fleesch woat en Sechaheit ruen.

¹⁰Dan miene Seel woascht du nich däm Scheol äwaloten, woascht nich tooloten, daut dien Fromma de Vewäsunk (Kul) sitt.

¹¹Du woascht mie däm Wajch toom Läwen bekaunt moaken; eene Menj von (saut moakende) Freid es ver dienem Aunjesecht, Leeftol en diene Rajchte emmadoa.