Read De Bibel JHF Psalm 2 Bible Online

Psalm 2 - De Bibel JHF bible

Psalm 2

¹Wuarom tooben de Nazionen un plonen (sennen) Iedlet de Velkja?

²Daut stonen opp de Kjennichs de Ieed, un de Ferschten rotschlonen met eenaunda jäajen däm Harn un jäajen sienen Jesaulwden:

³«Lot ons äare Faslen verieten, un äare Strenj von ons schmieten!»

⁴Dee em Himmel troont, lacht, dee Har spott äwa an.

⁵Dan woat hee to an räden en sienem Oaja, un en siene Zorngloot woat hee an enjsten.

⁶«Ekj ha mienen Kjennich jesaulft (enjesat) opp Zion, mienem heiljen Boajch!»

⁷Vom Beschluss well ekj vetalen: De Har haft to mie jerät: “Du best mien Sän, vondoag ha ekj die jebuaren.”

⁸Fodda von mie, un ekj well die toom Oawgoot de Nazionen jäwen, un toom Ieejentum de Enj de Ieed.

⁹Met eenem iesanem Stock woascht du an veschmatre, aus een Leemjefäss an veschmieten.

¹⁰Un nu, jie Kjennichs, siet vestendich, lot junt trajchtwiesen, jie Rechta de Ieed.

¹¹Deent däm Harn met Forcht, un freit junt met Zetren!

¹²Kusst däm Sän, daut hee nich doll woat, un jie omkomen opp däm Wajch, dan boolt woat sien Oaja entbrenne. Seelich aule, dee opp am vetruen (Tooflucht bie am nämen)!