Read De Bibel JHF Psalm 22 Bible Online

Psalm 22 - De Bibel JHF bible

Psalm 22

¹Däm Väasenja. No - Herschkoo aum Morjenroot. Een Psalm von David.

²Mien Gott, mien Gott, wuarom hast du mie veloten - best wiet auf von miene Radunk (Help), un de Wieed von mienem Stänen (Kloagen)?

³Mien Gott! Ekj roop aum Dach, un du auntwuadst nich, un de Nacht, un mie woat kjeene Ru.

⁴Doch du best heilich, dee du wonst unja däm Loffjesank Israels.

⁵Opp die vetruden onse Vodasch; dee vetruden, un du radsd an.

⁶Too die schrieejen see un worden jerat; see vetruden opp die un worden nich beschämt.

⁷Oba ekj sie een Worm un kjeen Maun, dee Spott von Menschen un dee vom Volkj Veachta.

⁸Aula, dee mie seenen, spotten äwa mie; see rieten de Leppen op, schedren met däm Kopp:

⁹«Hee vetrud opp Gott! Dee rad am, moak am frie, wiels hee aun am Lost haft!»

¹⁰Doch du best daut, dee mie ut däm Muttalief jetrocken haft, dee mie vetruen leet aun miene Mutta äare Brosten.

¹¹Opp die sie ekj jeschmäten vom Muttaschoot aun, von miene Muttalief aun best du mien Gott.

¹²Sie nich wiet von mie! Dan de Noot es dichtbie, dan kjeen Halpa es doa.

¹³Väle Stiasch (Bolles, Stoakje) ha mie omjäwen, de Stoakje von Baschan omrinjden mie;

¹⁴see ha äa Mul jäajen mie opjeräten, aus een rietenda un brellenda Leiw.

¹⁵Aus Wota sie ekj utjegoten, un aule miene Jläda ha sikj jetrant; aus Waus es mien Hoat jeworden, daut es jeschmolten en mienem Ennalichen.

¹⁶Miene Krauft es verdrieecht aus een Schoawel, un miene Tung backt aun mienem Bähn; un en däm Doodesstoff lajst du mie.

¹⁷Dan Hunj ha mie omrinjt, eene Rotte (Volkjsmenj) von Fräfla (Iebel doonende) ha mie omrinjt. See ha miene Henj un miene Feet derchgrowe [ommzinjle aus een Leiw miene Henj un miene Feet].

¹⁸Aule miene Jläda kaun ekj talen. See kjikjen un seenen äare Lost aun mie.

¹⁹See deelen miene Kjleeda unja sikj, un äwa mien Äwarock schmieten see daut Loss.

²⁰Oba du, Har, sie nich wiet auf! Miene Krauft, komm mie schwind too Help!

²¹Rad miene Seel vom Schwieet, miene eensje vonne Jewault de Hunj;

²²rad mie ut däm Leiw sien Rach! Jo, du hast mie erhieet vonne Hieena de Biffel.

²³Vekjindjen well ekj dienen Nomen miene Breeda; enne Medd de Jemeent well ekj die lowen.

²⁴Jie, dee jie däm Harn ferchten, loft am; aule vom Somen Jakob, veharlicht am, un fercht junt ver am, aule vom Somen Israels.

²⁵Dan hee haft nich veacht noch veaufschut daut Älent de Älendje, noch sien Aunjesecht ver am vestoaken; un aus hee to am schrieech, hieed hee.

²⁶Von die kjemt mien Loffjesank enne groote Vesaumlunk; betolen well ekj mien Vespräakjen ver dän, dee am ferchten.

²⁷De Bedrenjden (Älenden) woaren äten un saut woaren; daut woaren däm Harn lowen, dee am sieekjen; jun Hoat woat emma läwen.

²⁸Aule Enj de Ieed woaren doaraun denkjen un nom Harn omdreien; un ver die dolfaulen (Aunbäden) aule Jeschlajchta (Famieljes) de Nazionen.

²⁹Dan däm Harn sien es daut Rikj, un äwa de Nazionen Harscht hee.

³⁰Aule Rikje (Fate) de Ieed äten un faulen dol; ver am woaren sikj aula bieejen, dee en däm Stoff rauf foaren, un dee siene Seel nich aum Läwen erhoolen kaun.

³¹Een Somen woat am deenen; hee woat däm Harn aus een Jeschlajcht toojeräakjent woaren.

³²See woaren komen un vekjindjen siene Jerajchtichkjeit eenem Volkj, daut jebuaren woat, un daut hee daut jedonen haft.