Read De Bibel JHF Psalm 25 Bible Online

Psalm 25 - De Bibel JHF bible

Psalm 25

¹Von David. No die, Har, erhäw ekj miene Seel.

²Mien Gott, opp die vetru ekj: Lot mie nich beschämt woaren, lot miene Fiend sikj nich äwa mie freien.

³Uk woaren aule, dee opp die hopen, nich beschämt woaren; daut woaren beschämt woaren, dee onen Uasoak ontru haundlen.

⁴Diene Wäaj, Har, doo mie to weeten, diene Stiej lia mie!

⁵Leid mie en diene Woarheit un lia mie, dan du best dee Gott von mienem Heil; opp die hop ekj däm gaunzen Dach.

⁶Jedenkj diene Erboarmungen, Har, un diene Jnod (Leew); dan von Eewichkjeit häa sent dee.

⁷Jedenkj nich aun de Sinden en miene Jugent, noch aun miene Äwaträdungen; jedenkj du mie no diene Jnod, om diene Boarmhoatichkjeit wellen, Har!

⁸Goot un jerajcht (jlikj ut) es de Har, doarom wiest hee de Sinda opp däm rajchten Wajch.

⁹Hee leit de Saunftmootje (Älendje) nom Rajcht un lieet de Saunftmootje sienen Wajch.

¹⁰Aule Stiej vom Harn sent Jnod un Woarheit fa dee, dee sienen Bunt un siene Zeijnise bewoaren.

¹¹Om dienen Nomen wellen, Har, woascht du miene Schult (Vegonen) vejäwen {2Mo.34,9}; dan dee es groot.

¹²Wäa es dan dee Maun, dee däm Harn fercht? Hee woat am däm Wajch wiesen, däm hee wälen saul.

¹³Siene Seel woat em Jlekj wonen, un sien Somen daut Launt besetten.

¹⁴Daut Jeheemnis Gottes es fa dee, dee am ferchten, un sien Bunt, om an dän seljen toweeten loten.

¹⁵Miene Uagen sent emma oppem Harn jerecht; dan hee woat miene Feet rutfieren ut däm Nat.

¹⁶Drei die no mie un sie mie jnädich, dan ekj sie eensom un em älent.

¹⁷De Angst en mienem Hoat haft toojenomen; brinj mie rut ut miene Bedrenkjnisen!

¹⁸See aun mien Älent un miene Pien, un vejeef mie aule miene Sinden!

¹⁹Kjikj opp miene Fiend, dan dee sent väl, un met grausomen Hauss haussen see mie.

²⁰Bewoa miene Seel un rad mie! Lot mie nich beschämt woaren, dan ekj tru opp die.

²¹Oschult un Woarheit (Opprechtichkjeit) muchten mie bewoaren, dan ekj hop opp die.

²²Erlees Israel, oo Gott, ut aule siene Noot!