Read De Bibel JHF Psalm 26 Bible Online

Psalm 26 - De Bibel JHF bible

Psalm 26

¹Von David. Recht mie, Har! Dan un miene Oschult ha ekj jewaundelt; un oppem Har ha ekj vetrut, ekj woa nich wanken.

²Proow mie, Har, un vesieekj mie; reinj miene Nieren un mien Hoat!

³Dan diene Jnod es ver miene Uagen, un en diene Woarheit waundel ekj.

⁴Ekj ha nich jesäten bie faulsche Lied (Leajna), un met Hinjalestje jinkj ekj nich om.

⁵Ekj ha de Vesaumlunk de Iebel doonende jehaust, un bie Fräfla (Gottloose) saut ekj nich.

⁶Ekj wausch en Oschult miene Henj, un omgo dienen Aultoa, Har,

⁷om to hieren loten diene dankboare Stemm, un om to vetalen aule diene Wundawoakjen.

⁸Har, ekj ha jeleeft de Städ (Wonunk) en dienem Hus un däm Wonuat diene Harlichkjeit.

⁹Rop miene Seel nich wajch met de Sinda, noch mien Läwen met Blootjierje (Blootmensche),

¹⁰un dän äare Henj beeset Väahaben (Fräfel) es, un dee äare Rajchte voll Bestäakjung (toom Bekjeepe) es.

¹¹Oba ekj woa waundlen en miene Oschult. Erlees mie un sie mie jnädich!

¹²Mien Foot steit opp jlikjem Grunt: Däm Har woa ekj danken enne Vesaumlungen.