Read De Bibel JHF Psalm 29 Bible Online

Psalm 29 - De Bibel JHF bible

Psalm 29

¹Een Psalm von David. Jeft däm Harn, jie Säns de Stoakje (Gottessäns), jeft däm Harn Iea un Macht.

²Jeft däm Harn, sienem Nomen, de Iea; bäd däm Harn aun, em heiljen Schmuck.

³De Stemm vom Harn es äwa däm Wota; dee Har (El) de Harlichkjeit donnat, de Har äwa de groote Wotasch.

⁴De Stemm vom Harn es jewaultich, de Stemm vom Harn es harlich.

⁵De Stemm vom Harn vebrakjt de Zeeda, jo, de Har vebrakjt Zeeda vom Libanon;

⁶un hee moakt an huppsent aus een Kaulf, däm Libanon un Sirjon {5Mo.3,9} aus eenen jungen willen Oss.

⁷De Stemm vom Harn spretst Fiaflaumen.

⁸De Stemm vom Harn scheddat de Wieste, de Har scheddat de Wieste Kadesch.

⁹De Stemm vom Harn moakt Herschkjäj oppjeräacht, hee moakt kol de Weela; un en sienem Tempel räd aules (waut doabennen es): Iea (Harlichkjeit)!

¹⁰De Har troont opp (äwa) de Wotastreem (Äwaschwaminj), un de Har troont aus Kjennich opp Eewich.

¹¹De Har woat sienem Volkj Krauft jäwen, de Har woat sien Volkj met Fräd säajnen.