Read De Bibel JHF Psalm 32 Bible Online

Psalm 32 - De Bibel JHF bible

Psalm 32

¹Von David. Een Maskil (Belierunk). Jlekjseelich dee (Wool däm), däm de Äwaträdungen vejäft, däm siene Sinden toojedakjt sent (worden).

²Jlekjseelich dee Mensch, däm de Har de Ojjerajchtichkjeit nich aunräkjent, un en däm sien Jeist kjeene Faulschheit es!

³Aus ekj stell wia, vevollen miene Jläda derch mien Stänen, däm gaunzen Dach.

⁴Dan Dach un Nacht lach diene Haunt schwoa opp mie; vewaundelt wort miene Sauft enne Sommahett. (Sela)

⁵Miene Sinden bekjand ekj die un ha miene Ojjerajchtichkjeit nich toojedakjt. Ekj säd: Ekj well däm Harn miene Äwaträdungen bekjanen; un du, du hast mie miene Sindenschult vejäft. (Sela)

⁶Doarom woat jiedra Fromma to die bäden, too Tiet, woo du too finjen best; jewess, bie groote Wotastreem - am woaren dee nich errieekjen.

⁷Du best een Vestäakj fa mie; du bewoascht mie fa Bedrenkjnis; du omjäwst mie met Radungsfreid. (Sela)

⁸Ekj well die unjarechten un die dän Wajch lieren, däm du waundlen saust; mien Uag opp die jerecht, well ekj die roden.

⁹Siet nich aus een Pieed, aus een Multia, daut kjeen Vestaunt haft; met Toom un Täajel, äa Schmuck (Jescherr), motst du (äa willet benäme) an bandjen, sest komen dee nich no die.

¹⁰Väl Weedoag haft de Gottloosa; oba wäa oppem Har vetrut, däm woat Jnod omjäwen.

¹¹Freit junt en däm Harn un siet froo, jie Jerajchte, un jubelt, aule, jie von Hoaten Opprechtje.