Read De Bibel JHF Psalm 34 Bible Online

Psalm 34 - De Bibel JHF bible

Psalm 34

¹Von David, aus hee sien Vestaunt fa Abimelech vestald {1Sam.21,10-15}, un disa am wajch juach, un hee wajchjinkj.

²Ekj well däm Har aulentiet lowen; bestendich saul sien Loff en mienem Mul sennen.

³En däm Harn saul sikj miene Seel riemen; hieren woaren daut de Deemootje un sikj freien.

⁴Moakt däm Har met mie groot, un lot ons metenaunda sienen Nomen erhäwen!

⁵Ekj socht däm Harn, un hee auntwuad mie; un ut aule miene Angst rad hee mie.

⁶See kjikjen opp am un worden oppjemuntat (strolent), un äare Aunjesechta worden nich beschämt.

⁷Disa Älendje (Oama) roopt, un de Har hieed, un ut aule siene Noot rad hee am.

⁸De Enjel vom Harn loagat sikj om dee erom, dee am ferchten, un hee rad an.

⁹Schmakjt un kjikjt, daut de Har goot es! Wool däm Maun, dee opp am vetrut!

¹⁰Fercht dän Harn, jie siene Heilje! Dan kjeenen Mangel ha, dee am ferchten.

¹¹Junge Leiws lieden (woaren schwak) un hungren, oba dee däm Har sieekjen, ha kjeen mangel aun Goodem.

¹²Komt, jie Säns (Kjinja), hieet mie too: De Forcht vom Harn well ekj junt lieren.

¹³Wäa es de Maun, dee Lost toom Läwen haft, dee Doag leeft, om goodet to seenen?

¹⁴Bewoa diene Tung vom Beesen, un diene Leppen, daut see nich Läajes räden.

¹⁵Lot vom Beesen un doo Goodet; sieekj Fräd un joag am no!

¹⁶De Uagen vom Harn sent jerecht opp de Jerajchte, un siene Uaren opp äa Schrieen.

¹⁷Daut Aunjesecht vom Har es jäajen dee, dee Beeset doonen, om äa Jedajchnis von de Ieed uttoroten.

¹⁸See (de Jerajchte) schrieejen, un de Har hieed, un ut aule äare Noot (Angst) rad hee an.

¹⁹Dichtbie es de Har dän, dee jebroaknen Hoates sent, un dee veschloagnen Jeistes sent, dee rat hee.

²⁰De Jerajchta mott väl Iebel lieden, oba ut aul dee selje rad am de Har.

²¹Hee bewoat aule äare Jläda, nich eent von an woat vebroaken.

²²Däm Gottloosen woat daut Beese ombrinjen; un dee däm Jerajchten haussen, woaren fa schuldich jehoolen woaren.

²³De Har erleest de Seel siene Kjnajchts (Deena); un aule, dee opp am vetruen, woaren nich fa schuldich jehoolen woaren.