Read De Bibel JHF Psalm 35 Bible Online

Psalm 35 - De Bibel JHF bible

Psalm 35

¹Von David. Striet, Har, met dän, dee jäajen mie strieden, kjamf met dän, dee mie bekjamfen!

²Jriep Jewäa un Schilt un sto opp om mie too halpen!

³Un trakj dän Spies un veschlut däm Wajch jäajen miene Vefolja; räd to miene Seel: “Ekj sie diene Radinj!”

⁴Lot beschämt un to Schaund woaren, dee no mienem Läwen trachten; lot trigjgonen un met Schaund bedakjt woaren, dee Onheil jäajen mie ersennen (plonen).

⁵Lot an aus Sprie ver däm Wint sennen, un de Enjel vom Harn jajcht an wajch.

⁶Äa Wajch es diesta un jlepsich, un de Enjel vom Harn vefolcht an!

⁷Dan onen Uasoak ha see mie äa Nat heimlich jelajcht, onen Uasoak miene Seel eene Kul jegroft.

⁸Äwa an kjemt Vedoawen, onen daut hee et weet, un sien Nat, daut hee heimlich jelajcht haft, jript am; toom Vedoawen fält hee nenn!

⁹Un miene Seel woat froo sennen en däm Harn, sikj freien en siene Radinj.

¹⁰Aule miene Jläda woaren sajen: Har wäa es aus du! Dee du dän Älenden radst von däm, dee stoakja es aus hee, un dän Älenden un Oamen von däm, dee am berooft.

¹¹Doa stonen onjerajchte Zeijen opp; waut ekj nich weet, froagen see mie.

¹²See vejelten mie Beeset fa Goodet; veweist es miene Seel.

¹³Oba ekj, aus see krank wieren, kjleed ekj mie en Sakduak; ekj deemootijd miene Seel met Fausten, un mien Jebäd kjeem en mienem Bossem trigj;

¹⁴aus wia daut mie een Frint, een Brooda jewast, soo sie ekj omhäa jegonen; aus leet droagend om de Mutta ha ekj mie truarich doljebekjt.

¹⁵Oba see ha sikj äwa mien Faul jefreit un sikj vesaumelt; Lestamula ha sikj jäajen mie vesaumelt, un ekj kjand an nich; see ha jelestat un nich oppjehieet.

¹⁶Aus ruchloose Schmarotza kjnirschten (gnorschten) see met äare Tänen.

¹⁷Har, woo lang west du toseenen? Brinj miene Seel trigj ut äare Vewustunk, von däm jungen Leiw miene eensome.

¹⁸Ekj woa die enne groote Vesaumlunk danken, unja välem Volkj die lowen.

¹⁹Lot sikj nich äwa mie freien, dee onen Uasoak mie Fiend sent, un plinkjre nich met de Uagen, dee onen Uasoak mie haussen!

²⁰Dan see räden nich von Fräd; un jäajen de Stelle em Launt ersennen see Läajes.

²¹Un see ha äa Mul jäajen mie opjemoakt; see ha jesajcht: Haha! Haha! Ons Uag haft daut jeseenen!

²²Du hast daut jeseenen, Har; sie nich stell! Har, sie nich wietauf von mie!

²³Woak opp un woak to mienem Rajcht, mien Gott un Har, to miene Rajchtsache!

²⁴Schauf mie Rajcht no diene Jerajchtichkjeit, Har, mien Gott! Un lot an sikj nich äwa mie freien!

²⁵Lot an nich en äarem Hoaten sajen: Haha, soo wull wie daut! Lot an nich sajen: Wie ha am veschlungen!

²⁶Lot an sikj schämen un aula toop met Schaund bedakjt woaren, dee sikj äwa mien Onjlekj freien! Lot met Schomp un Schaund bekjleet woaren, dee jäajen mie groot doonen!

²⁷Lot jublen un sikj freien, dee Jefaulen (Lost) ha aun miene Jerajchtichkjeit, un lot an emma sajen: Groot es de Har, dee Lost haft aun sienem Kjnajcht sien Wool (goot gone)!

²⁸Un miene Tung woat räden von diene Jerajchtichkjeit, von dienem Loff dän gaunzen Dach.