Read De Bibel JHF Psalm 37 Bible Online

Psalm 37 - De Bibel JHF bible

Psalm 37

¹Von David. Oaja die nich äwa de Beese, beneid dee nich, dee Orrajcht doonen.

²Dan aus Grauss woaren dee vegonen, un aus daut jreene Krut vewalkje.

³Vetru oppem Harn un doo goodet; won em Launt un eew Tru to sennen;

⁴un erjats die aum Harn; soo woat hee die jäwen om waut dien Hoat bedd.

⁵Befäl däm Harn dienen Wajch un vetru opp am! Un hee woat haundlen;

⁶un hee woat diene Jerajchtichkjeit väa komen loten aus daut Licht un dien Rajcht aus däm Meddach.

⁷Vetru stell däm Harn un hool die aun am! Oaja die nich äwa däm, däm sien Wajch jelinjt, äwa däm Maun, dee beese Aunschläaj utfieet!

⁸Lot auf vom Oaja un lot däm Groll! Oaja die nich! Daut fieet blooss toom Iebel.

⁹Dan de Iebel doonende (Beese) woaren utjerot; oba dee oppem Harn hopen, dise woaren daut Launt besetten (oawen).

¹⁰Un noch een Beskje, un de Gottloose es nich mea; un du kjikjst die no siene Städ om, soo es hee nich doa.

¹¹Oba de Saunftmootje woaren daut Launt besetten un woaren sikj aun groote Fräd erjatsen.

¹²De Gottloose plont jäajen däm Jerajchten, un hee kjnirscht met siene Tänen jäajen am.

¹³De Har lacht äwa am, dan hee sitt, daut sien Dach kjemt.

¹⁴De Gottloose ha daut Schwieet jetrocken un äaren Boagen jespaunt, om däm Älenden un däm Oamen toom faul to brinjen, too schlachten, dee en Woarheit waundlen.

¹⁵Äa Schwieet woat en äa ieejnet Hoat drinjen, un äare Boages woaren vebroaken woaren.

¹⁶Bäta daut Weinje vom Jerajchten, aus de Äwafluss väle Gottloose.

¹⁷Dan de Oarms de Gottloose woaren vebroaken woaren, oba de Har stett de Jerajchte.

¹⁸De Har kjant de Vollkomne äare Doag, un äa Oawgoot woat eewich sennen;

¹⁹dee woaren nich beschämt woaren enne Ojjlekjstiet, un enne Hungaschdoag woaren see saut woaren (sennen).

²⁰Dan de Gottloose woaren omkomen, un de Fiend vom Harn aus de Pracht de jreene Weid; see veschwinjen, see veschwinjen em Ruak.

²¹De Gottloosa borjt un jeft nich trigj; de Jerajchta oba es jnädich un jeft.

²²Dan dee von am Jesäajende woaren daut Launt besetten, oba dee von am Vefluchte woaren utjerot woaren.

²³Vom Harn woaren däm Maun siene Schräd faust jemoakt, un aun sienem Wajch haft hee jefaulen;

²⁴wan hee fält, woat hee nich hanjestrakjt woaren, dan de Har stett siene Haunt.

²⁵Ekj wia junk un sie uk oolt jeworden, un ekj ha nie dän Jerajchten veloten jeseenen, noch sienem Somen no Broot bedden;

²⁶däm gaunzen Dach es hee jnädich un liet, un sien Somen woat jesäajent sennen.

²⁷Lot vom Beesen un doo Goodet, un bliew eewich!

²⁸Dan de Har leeft daut Rajcht un woat siene Fromme nich veloten; eewich woaren see bewoat, oba de Somen de Gottloose woat utjerot.

²⁹De Jerajchte woaren daut Launt besetten un woaren fa emma doa wonen.

³⁰Daut Mul de Jerajchte räd Weisheit, un siene Tung räd daut Rajcht;

³¹daut Jesaz von sienem Gott es en sienem Hoaten, siene Schräd woaren nich wanken.

³²De Gottloose luaren opp däm Jerajchten un sieekjt am omtobrinjen;

³³de Har woat am nich en siene Haunt loten, un am nich vedaumen, wan hee jerecht woat.

³⁴Vetru oppem Harn un bewoa sienen Wajch; un hee woat die nohecht häwen, daut Launt too besetten. Wan de Gottloose utjerot woaren, woascht du toseenen.

³⁵Ekj ha eenen Gottloosen jeseenen, dee jewaultich wia, un dee sikj utbreed aus een nich veplaunta jreena Boom;

³⁶un maun jinkj vebie, un kjikj, hee wia nich mea; un ekj socht am, un hee wort nich jefungen.

³⁷Acht opp däm Onschuldjen un kjikj opp däm Opprechtjen; dan fa däm frädlichen Maun jeft daut eene Tookunft.

³⁸Oba de Iebel doonende woaren aula toop vetilcht, de Tookunft de Gottloose woat aufjeschnäden.

³⁹Oba de Radunk de Jerajchte es vom Harn, dän äare Krauft es enne Tiet de Noot;

⁴⁰un de Har woat an halpen un an raden; hee woat an raden von däm Gottloosen un an Radunk veschaufen, dan see vetruen opp am.