Read De Bibel JHF Psalm 38 Bible Online

Psalm 38 - De Bibel JHF bible

Psalm 38

¹Een Psalm von David toom Jedajchnis.

²Har, strof mie nich en dienem Oaja un schlo mie nich en diene (Oaja) Wutt.

³Dan diene Feilasch sent en mie ennjedrunge, un diene Haunt haft sikj opp mie raufjeloten.

⁴Nuscht Heelet (Jesundet) es aun mienem Fleesch wäajen dien Oaja, kjeen Fräd en miene Jläda wäajen miene Sinden.

⁵Dan miene Onjerajchtichkjeiten sent äwa mien Haupt jegonen, aus eene schwoare Laust sent see, too schwoa, fa mie.

⁶Daut stinkjen, daut tjietre miene Wunden wäajen miene Noaheit.

⁷Ekj sie kromm, äwa de Mot jebekjt; däm gaunzen Dach go ekj truarich omhäa.

⁸Dan voll Braunt sent miene Lenden, un nuscht Heelet es aun mienem Fleesch.

⁹Ekj sie meed un äwa de Mot veschloagen, ekj hiel fa Stänen en mienem Hoaten.

¹⁰Har, ver die es aul mien Velangen, un mien vesefze es nich ver die veborjen.

¹¹Mien Hoat kloppt, veloten haft mie miene Krauft; un daut Licht miene Uagen, uk daut es nich bie mie.

¹²Miene Leewe un miene Frind stonen wiet auf von miene Ploag, un miene Näakjste stonen wiet auf.

¹³Un dee no mienem Läwen trachten, lajen mie Schlenjen; un dee mien Onjlekj sieekjen, räden von Vedoawen un räden Läajes däm gaunzen Dach.

¹⁴Oba ekj, sie aus een Doofa, hia nich, un sie aus een Stomma, dee sien Mul nich opmoakt.

¹⁵Un ekj sie aus een Maun, dee nich hieet, un en däm sien Mul kjeene Wadaräd sent.

¹⁶Dan opp die, Har, lua ekj; du woascht auntwuaden, Har, mien Gott.

¹⁷Dan ekj säd: «Daut see sikj nich äwa mie freien!» Biem wanken von mienem Foot doonen see groot jäajen mie.

¹⁸Dan ekj sie dicht aum faulen, un miene Weedoag sent emma ver mie.

¹⁹Dan ekj bekjan miene Schult; ekj sie besorcht wäajen miene Sinden.

²⁰Oba miene Fiend läwen, sent stoakj (väl); un väl sent dee, dee onen Grunt mie haussen.

²¹Un Beeset fa Goodet vejelten, see fiende mie aun, wiels ekj däm Gooden nojoag.

²²Velot mie nich, Har; mien Gott, sie nich wiet auf von mie!

²³Spood die mie too halpen, Har, miene Radinj!