Read De Bibel JHF Psalm 39 Bible Online

Psalm 39 - De Bibel JHF bible

Psalm 39

¹Däm Väasenja, däm Jedutun {1Chr.16,41.42; 25,1.3}. Een Psalm von David.

²Ekj säd: Ekj well miene Wäaj bewoaren, daut ekj nich sindj met miene Tung; ekj well mien Mul met eenem Mulkorf (Toom) vedakjen, soo lang de Gottloosa ver mie es.

³Ekj vestomm em stellen, ekj sie stell vom Gooden, un miene Weedoag wieren oppjeräacht.

⁴Mien Hoat brent en mienem Ennalichen, bie mienem Nosennen entzindet sikj Fia; ekj räd met miene Tung:

⁵Doo mie to weeten, Har, mien Enj, un daut Mot miene Doag, wooväl daut sent, daut ekj weet, woo vejenkjlich ekj sie!

⁶Kjikj, aus Hauntbreet hast du miene Doag jemoakt, un miene Läwenstiet es aus nuscht ver die; jo, blooss een Frodem es jiedra Mensch, dee doa steit. (Sela)

⁷Jo, aus een Aufbilt (Schautenbilt) waundelt de Mensch omhäa; jo, vejäws es hee voll Onru; hee saumelt toop un weet nich, wäa daut ensaumlen woat.

⁸Un nu, opp waut lua ekj, Har? Miene Hopninj es opp die!

⁹Rad mie von aule miene Äwaträdungen, moak mie nich toom Spiet (Spott) de Noaren!

¹⁰Ekj sie vestommt, ekj moak (doo) mien Mul nich op; dan du, du hast daut jedonen.

¹¹Drei diene Ploagen von mie auf! Derch de Schläaj von diene Haunt vego ekj.

¹²Strofst du eenen Maun met Zichtijung fa de Ojjerajchtichkjeit, soo latst du siene Scheenheit aus de Motte vegonen; jo, een Frodem sent aule Menschen. (Sela)

¹³Hea mien Jebäd, Har, un nemm too Uaren mien schrieen; sie nich stell to miene Tronen! Dan een Framda sie ekj bie die, een Gaust aus aule miene Vodasch.

¹⁴Kjikj wajch von mie, daut ekj oppjeheitat woa, ea ekj doahan go un nich mea sie!