Read De Bibel JHF Psalm 40 Bible Online

Psalm 40 - De Bibel JHF bible

Psalm 40

¹Däm Väasenja. Von David, een Psalm.

²Hopninjsvoll ha ekj oppem Harn vetrut, un hee haft sikj to mie jeneicht un mien Schrieen jehieet.

³Hee haft mie nohecht jetrocken ut de Vedoawniskul, utem Moarast; un hee haft miene Feet opp eenem Steen jestalt. Miene Schräd befaustijt.

⁴Un en mienem Mul haft hee een nieet Leet jelajcht, een Loffjesank onsem Gott. Väle woaren daut seenen un sikj ferchten un oppem Har vetruen.

⁵Jlekjseelich de Maun, dee däm Harn too sienem Vetruen moakt un sikj nich dreit no de Stolte un no dän, dee too Läajes neije!

⁶Väl hast du diene Wundawoakjen un diene Jedanken jäajen ons erwäsen, Har, mien Gott; maun kaun die dee nich de Rieej no väaschtale. Ekj wull doavon berechten un räden, daut sent too väl, om dee too talen.

⁷Aun Schlacht- un Speisopfa haudst du kjeene Lost; Uaren hast du mie reedjemoakt: Braunt- un Sindopfa hast du nich jefoddat.

⁸Doa säd ekj: Kjikj, ekj kom; enne Buakroll steit von mie jeschräwen.

⁹Dien Wooljefaulen to doonen, mien Gott, es miene Lost; un dien Jesaz es em Ennalichen en mienem Hoaten.

¹⁰Ekj ha daut Heil (de frooe Bootschoft) vekjindicht enne groote Vesaumlunk; kjikj, miene Leppen veschloot ekj nich - Har, du weetst daut!

¹¹Diene Jerajchtichkjeit ha ekj nich veborjen em Ennalichen von mienem Hoaten; diene True un diene Help ha ekj utjesproake, diene Leew un diene Woarheit nich trigjjehoolen ver de groote Vesaumlunk.

¹²Du, Har, hool diene Erboarmungen nich von mie trigj; diene Jnod un diene Woarheit lot mie emma bewoaren!

¹³Dan Iebel onen Zol ha mie omjäwen, miene Onjerajchtichkjeiten ha mie enjeholt, daut ekj nich seenen kaun; dee sent väl mea aun Zol aus de Hoa opp mienem Haupt, un mien Hoat haft mie veloten.

¹⁴Lot die jefaulen, Har, mie to raden! Har, spood die mie too Halpen!

¹⁵Lot an aula toop beschämt un met Schaund bedakjt woaren, dee no mienem Läwen trachten, daut to venichten; lot an trigj gonen un to Schaund woaren, dee jefaulen ha aun mienem Onjlekj!

¹⁶Lot sikj schämen äwa äare Schaund, dee von mie sajen: Haha! Haha!

¹⁷Lot Froo sennen un sikj freien, en die aule, dee die sieekjen; dee diene Radunk leewen, lot emma sajen: Groot es de Har!

¹⁸Oba ekj sie älent un oam; de Har denkjt aun mie. Miene Help un mien Rada best du; mien Gott, siem nich!