Read De Bibel JHF Psalm 41 Bible Online

Psalm 41 - De Bibel JHF bible

Psalm 41

¹Däm Väasenja. Een Psalm von David.

²Wool däm, dee opp de Oame acht jeft! Aum Ojjlekjsdach woat de Har am raden.

³De Har woat am bewoaren un am aum Läwen hoolen; hee woat jlekjlich sennen oppe Ieed (em Launt), un du woascht am nich de Jia siene Fiend hanjäwen.

⁴De Har woat am stette opp däm Krankebad, sien gaunzet Loaga waundelst du om en siene Krankheit.

⁵Ekj säd: Har, sie mie jnädich! Heel miene Seel, dan ekj ha jäajen die jesindicht.

⁶Miene Fiend wenschen (räden jäajen) mie Iebel: Wanea woat hee stoawen un sien Nomen vegonen?

⁷Un wan eena kjemt, om mie to seenen, soo räd hee Läajes; sien Hoat saumelt sikj Onheil - hee jeit rut, un räd doavon.

⁸Meteenaunda fuschle jäajen mie aule miene Haussa; see denkjen Beeset jäajen mie:

⁹Een Belialsstekj kjleewt am aun; un wiels hee nu doa licht, woat hee nich wada oppstonen.

¹⁰Uk de Maun - mienem Frint, opp däm ekj vetrud, dee mien Broot aut, haft de Feet jäajen mie oppjehowen.

¹¹Oba du, Har, sie mie jnädich un recht mie opp, daut ekj an daut vejelt!

¹²Doaraun erkjan ekj, daut du aun mie jefaulen hast, daut mien Fient sikj nich äwa mie freit.

¹³Oba ekj, en miene Oschult hast du mie faust jehoolen un mie ver die opp eewich jestalt.

¹⁴Jesäajent es de Har, de Gott Israels, von Eewichkjeit bat en Eewichkjeit! Amen, jo, Amen.