Read De Bibel JHF Psalm 42 Bible Online

Psalm 42 - De Bibel JHF bible

Psalm 42

¹Däm Väasenja. Een Maskil (Belierunk) von de Säns Korah.

²Aus een Hersch velangt nom Wotastroom (freschem Wota), soo velangt miene Seel no die, oo Gott.

³Miene Seel darscht no Gott, nodäm läwendjen Gott (El): Wanea woa ekj komen un ver Gottes Aunjesecht erschienen?

⁴Miene Tronen sent mie toom Äten jeworden Dach un Nacht, doa maun däm gaunzen Dach to mie sajcht: Wua es dien Gott?

⁵Doaraun well ekj denkjen un en mie miene Seel utschedde, woo ekj omhäa jinkj em Jedrenj, met an wull nom Hus Gottes, met ne Jubelstemm un Danksaje, eene fiarende Menj.

⁶Waut best du bedrekjt (jebekjt), miene Seel, un best orruich en mie? Hop opp Gott, dan ekj woa am noch danken fa daut Heil en sienem Aunjesecht.

⁷Mien Gott, bedrekjt (jebekjt) es miene Seel en mie; doarom denkj ekj aun die ut däm Launt Jordan un Hermon, vom Boajch Mizar.

⁸Een Wotastroom roopt däm Wotastroom biem ruzhen diene Wotafaule; aul diene Wotawalen un diene Walle sent äwa mie jegonen.

⁹Äwa Dach woat de Har siene Jnod aunbeeden, un de Nacht woat sien Leet bie mie sennen, een Jebäd to däm Gott von mienem Läwen.

¹⁰Ekj well too Gott (El) sajen, mien Steen (Fels): Wuarom hast du mie vejäten? Wuarom go ekj truarich omhäa wäajen de Bedrenjung de Fiend?

¹¹Aus eene Vekjwatschung en miene Jläda vespotten mie Bedrenja, endäm see däm gaunzen Dach to mie sajen: Wua es dien Gott?

¹²Waut best du bedrekjt, miene Seel, un waut best du orruich en mie? Hop opp Gott, dan ekj woa am noch lowen, dee daut Heil fa mienem Aunjesecht un mien Gott es.