Read De Bibel JHF Psalm 44 Bible Online

Psalm 44 - De Bibel JHF bible

Psalm 44

¹Däm Väasenja. Von de Säns Korah, Een Maskil (Belierunk).

²Gott, met onse Uaren ha wie jehieet, onse Vodasch ha ons vetalt daut groote Dooden, dee du jewirkjt hast en äare Doag, enne Doag ver de oole Tiet.

³Du, met diene Haunt hast du Velkja vedräwe, un an (onse Vodasch) hast du jeplaunt, Velkja hast du venicht, un an (onse Vodasch) hast du vebreed.

⁴Dan nich derch äa Schwieet ha see daut Launt jeoarwen, un nich äa Oarm haft an jerat; sonda diene Rajchte un dien Oarm un daut Licht von dienem Aunjesecht, wiels du Wooljefaulen aun an haudst.

⁵Du selfst best mien Kjennich {Ps.102,28}, oo Gott; jebeed (jeff) fa Jakob de Help.

⁶Derch die woa wie onse Bedrenja vesteeten; derch dienen Nomen woa wie veklunjen, dee jäajen ons oppstonen.

⁷Dan nich opp mien Boagen vetruen ekj, un mien Schwieet woat mie nich raden.

⁸Dan du radst ons von onse Bedrenja, un onse Haussa hast du beschämt.

⁹En Gott riem wie onst däm gaunzen Dach, un dienen Nomen woa wie eewich lowen. (Sela)

¹⁰Doch du hast ons vestat un to Schaund jemoakt, un jinjst nich ut met onsem Häa.

¹¹Du leetst ons trigjtrakjen fa onse Bedrenja, un onse Haussa ha fa sikj jeplindat.

¹²Du jeefst ons han aus Schlachtschop, un unja de Velkja hast du ons vestreit.

¹³Du vekoffst dien Volkj om een Jerinjet un hast äarem Pries nich huach jestalt.

¹⁴Du muakst ons too Schaund fa onse Nobasch, toom Spott un Schellen fa dän, dee ons omjäwen.

¹⁵Du muakst ons toom Sprechwuat unja de Velkja, toom Kopp schedren unja de Heiden.

¹⁶Däm gaunzen Dach es miene Schmach ver mie, un de Schaund bedakjt mien Aunjesecht,

¹⁷wäajen de Stemm de Spata un Lestara, wäajen de Fiend un de Rach jierichen.

¹⁸Dit aules es äwa ons jekomen, un wie ha die nich vejäten, noch faulsch jehaundelt jäajen dienen Bunt.

¹⁹Ons Hoat es nich trigj jegonen, un onse Schräd sent nich aufjeboagen von dienem Wajch;

²⁰daut du ons jeschloagen hast aum Uat de Schakale, un ons bedakjt hast met däm Doodesschauten.

²¹Wan wie däm Nomen von onsem Gott vejäten hauden un onse Henj no eenem framden Gott (El) utjestrakjt hauden,

²²wudd Gott daut nich erforschen? Hee kjant de Jeheemnisen em Hoat.

²³Dan om dient haulwen woa wie däm gaunzen Dach omjebrocht, aus Schlachtschop sent wie jeacht.

²⁴Wuak opp! Wuarom schlapst du, Har? Wuak opp! Velot ons nich opp emma!

²⁵Wuarom vestakjst du dien Aunjesecht, vejatst ons Älent un onse Bedrekjung?

²⁶Dan onse Seel es en däm Stoff jebekjt, ons Lief backt aune Ieed.

²⁷Sto opp, ons too halpen, un erlees ons opp Grunt diene Jnod!