Read De Bibel JHF Psalm 45 Bible Online

Psalm 45 - De Bibel JHF bible

Psalm 45

¹Däm Väasenja, no Schoschanim (Lelje). Von de Säns Korah; een Weisheitsleet, een Leet fa de Jeleewde.

²Daut bewäacht mien Hoat vom gooden Wuat. Ekj saj: Miene Jedichta sent fa däm Kjennich! Miene Tung es de Jreffel von eenem foadjem Schriewa.

³Du best prachtvolla aus Menschensäns, äwa diene Leppen es Jnod utjegoten; doarom haft Gott die eewichlich jesäajent.

⁴Schnall dien Schwieet om de Hoften, du Held, diene Pracht un diene Majestät!

⁵Un en diene Majestät foa jlekjlich han om daut Wuat de Woarheit wellen un de Saunftmoot un de Jerajchtichkjeit; un Furchtboaret woat die lieren diene Rajchte.

⁶Diene Feilasch sent schoap - Velkja faulen unja die, - dee drinjen de Kjennichsfiend em Hoat.

⁷Dien Troon, oo Gott, es emma un eewich; een Zepta de Opprechtichkjeit es daut Zepta von dienem Rikj.

⁸Jerajchtichkjeit hast du jeleeft un Gottloosichkjeit jehaust: Doarom haft Gott, dien Gott, die jesaulft met Freideneelj, mea aus diene Frind.

⁹Miren un Aloe, Kassia sent aule diene Kjleeda; ut Paulausten von Aulfenbeen freit die daut Seidenspell.

¹⁰Kjennichsdajchta sent unja diene Frues (Harliche); de Kjennijin steit aun diene Rajchte en Golt von Ofir.

¹¹Horch, Dochta, un kjikj, un neij dien Ua; un vejat dien Volkj un dien Vodahus!

¹²Un de Kjennich woat diene Scheenheit jefaulen (jankren), dan hee es dien Har: Soo sie am unjadon (huldij am)!

¹³Un de Dajchta Tierus, dee Rikje utem Volkj, woaren met Jeschenkja diene Jenst (Aunjesecht) sieekjen.

¹⁴Gaunz Harlich es de Kjennichs Dochta bennen, von Golt jemoakt äa Kjleet;

¹⁵em bunt jemoaktem Kjleet woat see nom Kjennich jefieet woaren; Junkfrues hinja äa häa, äare Bejleita, woaren no die jebrocht woaren.

¹⁶See woaren met Freid un Jubel jefieet, see gonen nenn en däm Kjennichspaulaust.

¹⁷Aun diene Vodasch Städ woaren diene Säns sennen; too Ferschten woascht du an ensaten em gaunzen Launt.

¹⁸Ekj well dienen Nomen jedenkjen loten derch aule Jeschlajchta; doarom woaren de Velkja die lowen emma un eewich.