Read De Bibel JHF Psalm 48 Bible Online

Psalm 48 - De Bibel JHF bible

Psalm 48

¹Een Psalm - Leet. Von de Säns Korah.

²Groot es de Har un sea too lowen enne Staut von onsem Gott opp sienem heiljen Boajch.

³Scheen erhäft sikj, eene Freid de gaunze Ieed, de Boajch Zion, aun de Nuadsied, de Staut vom groote Kjennich.

⁴Gott es bekaunt en äare Paulausten aus eene huage Burjch.

⁵Dan kjikj, de Kjennichs hauden sikj vesaumelt, wieren aula toop doatoo jekomen.

⁶See sagen, doa staunden see; see vefieeden sikj, enjstlich randen see wajch.

⁷Een zetren äwavoll an doa, Angst aus eene Jebäarende.

⁸Derch däm Oostwint veschmatascht du de Tarsus Schäp.

⁹Aus wie jehieet hauden, soo ha wie daut jeseenen enne Staut Gottes de Häaschoa, enne Staut von onsem Gott: Gott woat an faustmoaken bat en Eewichkjeit. (Sela)

¹⁰Wie jedenkjen, oo Gott, aun diene Jnod, em Bennaschten von dienem Tempel.

¹¹Aus dien Nomen, Gott, soo es dien Riem bat aum Enj de Ieed; met Jerajchtichkjeit es jefelt diene Rajchte.

¹²Daut freit sikj de Boajch Zion, daut sellen jublen de Dajchta von Juda om diene Jerechten wellen.

¹³Omgot Zion un omkjreist am, talt siene Torms,

¹⁴kjikjt jeneiw aun siene Mia, got derch siene Paulausten, doamet jie daut däm näakjsten Jeschlajcht vetalen kjennen!

¹⁵Dan dis Gott es ons Gott emma un eewich! Hee woat ons fieren bat aun däm Doot.