Read De Bibel JHF Psalm 49 Bible Online

Psalm 49 - De Bibel JHF bible

Psalm 49

¹Däm Väasenja. Von de Säns Korah, een Psalm.

²Dit hieet, jie, aule Velkja; nämt daut to Uaren, aule Bewona de Welt (Ieed);

³soo aus Menschensäns aus Mannasäns, Rikje un Oame aula toop!

⁴Mien Mul saul Weisheit räden, un daut Denkjen en mienem Hoat saul Ensecht sennen.

⁵Ekj well mien Ua to eenem Spruch hanhoolen, mien Rotsel bie de Hoap opmoaken.

⁶Wuarom sull ekj mie en Ieble Doag ferchten, wan dee äare Ojjerajchtichkjeit, dee mie oppe Hacken sent, mie omrinjt,

⁷dee opp äa Vemäajen vetruen un met äarem groote Rikjtum sikj riemen?

⁸En kjeenem Faul kaun wäa sienen Brooda erleesen, hee kaun nich Gott sien Leesjelt jäwen,

⁹(dan dia es de Erleesunk äare Seel, un hee mott doavon aufstonen opp eewich),

¹⁰daut hee fa emma läft, daut Grauf nich sitt.

¹¹Dan hee sitt, daut de Weise stoawen, daut de Onweise un de Noa met eenaunda omkomen un fa aundre äa Vemäajen loten.

¹²Äa Jedanken es, daut äare Hiesa en Eewichkjeit stonen, äare Woninj von Jeschlajcht too Jeschlajcht; see nanen Lenda no äarem Nomen.

¹³Un de Mensch, dee en Aunseenen es, blift nich; hee es aus daut Vee, daut vetilcht woat.

¹⁴Dise, äa Wajch es äare Noaheit; un dee no an komen, ha Wooljefaulen aun äare Wieed. (Sela)

¹⁵Maun lajcht an em Scheol aus Schop, de Doot weidet an; un tiedich Zemorjes harschen de Opprechtje äwa an; un äare Jestault woat de Scheol vetäaren, onen daut see eene Wonunk haft.

¹⁶Oba Gott woat miene Seel erleesen von de Jewault em Scheol; dan hee woat mie oppnämen {1Mo.5,24}. (Sela)

¹⁷Forcht die nich, wan een Maun sikj rikj moakt, wan sikj vejratat de Harlichkjeit en sienem Hus.

¹⁸Dan wan hee stoaft, nemt hee daut aules nich met; siene Pracht kjemt am nich hinjaraun.

¹⁹Wan hee uk siene Seel en sienem Läwen säajend, - un maun woat die lowen, wan du die selfst goodet deist -

²⁰see woat komen nom Jeschlajcht siene Vodasch; see woaren niemols mea daut Licht seenen.

²¹Dee Mensch, dee en Aunseenen es un kjeene Ensecht haft, es aus daut Vee, daut vetäat woat.