Read De Bibel JHF Psalm 5 Bible Online

Psalm 5 - De Bibel JHF bible

Psalm 5

¹Däm Väasenja, met Fleetenspell. Een Psalm von David.

²Nemm too Oaren, oo Gott, miene Wieed, moakj opp mien Nosennen (Kloagen)!

³Horch opp de Stemm en mienem Schrieen, mien Kjennich un mien Gott! Dan to die bäd ekj.

⁴Zemorjes west du, Gott miene Stemm hieren, zemorjes woa ekj mien Aunlidjen die brinjen (väastalen) un luaren.

⁵Dan du best nich een Gott, dee aun Gottloosichkjeit jefaulen haft; bie die woat daut Beese nich bliewen.

⁶De Prola (Äwamotje) woaren nich bestonen ver diene Uagen; du haust aule, dee Fräfel doonen.

⁷Du woascht vetiljen de Läajes räden; däm Blootdarschtjen Maun un Faulschen veaufschut Gott.

⁸Ekj oba, ekj woa derch de groote (Harlichkjeit) diene Jnod nengonen en dien Hus, ekj woa aunbäden en diene Forcht jäajen dienen heiljen Tempel {1Kjeen.6,3}.

⁹Leid mie, Har, en diene Jerajchtichkjeit om miene Fiend äa wellen; moak jlikj ver mie dienen Wajch.

¹⁰Dan en äarem Mul es nuscht Toovelotjet; äa Ennalichet es Vedoawnis, een opnet Grauf äa Rach; met äare Tung heichlen see.

¹¹Lot an busse, oo Gott; lot an faulen derch äare Aunschläaj! Steet an wajch wäajen de Menj äare Äwaträdungen! Dan see sent wadaspanstich jäajen die jewast.

¹²Soo woaren sikj aula freien, dee opp die vetruen; eewich woaren see jublen, un du woascht an bedakjen; un en die woaren sikj freien, dee dienen Nomen leewen.

¹³Dan du woascht däm Jerajchten säajnen; Har, met Gonst woascht du am omjäwen aus met eenem Schild.