Read De Bibel JHF Psalm 50 Bible Online

Psalm 50 - De Bibel JHF bible

Psalm 50

¹Een Psalm; von Asaf. Dee Majchtja (El), Gott, de Har, haft jerät un roopt de Ieed vom Oppgank de Sonn bat no äarem Unjagank.

²Ut Zion, de Scheenheit Vollendunk, schient Gott väa.

³Ons Gott kjemt, un hee woat nich stell sennen; Fia frat ver am häa, un om am rom stormt daut jewaultich.

⁴Hee roopt däm Himmel bowen un de Ieed, om sien Volkj too rechten:

⁵«Vesaumelt mie miene Fromme, dee mienen Bunt jeschloten ha biem Opfa!»

⁶Un de Himmel vekjindjen siene Jerajchtichkjeit, dan Gott es daut, dee rechten deit. (Sela)

⁷«Horch, mien Volkj, un ekj well räden, Israel, un ekj well jäajen die zeijen! Ekj sie Gott, dien Gott.

⁸Nich wäajen diene Schlachtopfa schell ekj die, un diene Brauntopfa sent bestendich ver mie.

⁹Ekj neem kjeenem jungen Boll ut dienem Hus, noch Bakj ut diene Häaden.

¹⁰Dan aule Tieren em Woolt sent miene, daut Vee opp 1000 Boaj.

¹¹Ekj kjan aule Väajel oppe Boaj, un Tieren opp däm Flekj {Ps.80,14} (aules waut sikj bewäacht) sent (es) mie bekaunt.

¹²Wan mie hungad, ekj wudd daut die nich sajen; dan miena es de Ieedkjreis un waut äa felt.

¹³Saul ekj daut Fleesch von Ossen äten un daut Bloot von Bakj drinkjen?

¹⁴Opfa Gott Dank, un betol däm Hechsten dien Vespräakjen;

¹⁵un roop mie aun aum Dach de Bedrenkjnis: Ekj well die raden, un du woascht mie ieren!»

¹⁶Oba toom Gottloosen sajcht Gott: «Waut hast du von miene Sazungen to räden un mien Bunt en dien Mul too nämen?

¹⁷Du hast de Zucht jehaust un miene Wieed hinja die jeschmäten.

¹⁸Wan du eenen Deef sachst, soo jinjst du jieren met am om, un dien Deel wia met Ehebräakja.

¹⁹Dien Mul leetst du loos toom Beesen, un diene Tung flajcht Läajes.

²⁰Du sautst doa, rädst jäajen dienen Brooda, jäajen däm Sän diene Mutta deist du schellen.

²¹Daut hast du jedonen, un ekj wia stell; du dochst, ekj sie gaunz aus du. Ekj woa die strofen un die daut vere Uagen stalen».

²²Dit moakjt doch, dee jie Gott vejäten, doamet ekj nich veriet, un kjeen Rada es doa!

²³Wäa Dank opfat, veharlicht mie, un wäa sienen Wajch ennrecht, am woa ekj daut Heil Gottes seenen loten.