Read De Bibel JHF Psalm 51 Bible Online

Psalm 51 - De Bibel JHF bible

Psalm 51

¹Däm Väasenja. Een Psalm von David,

²aus de Profeet Natan no am kjeem, nodäm hee no Batseba enjegonen wia.

³Sie mie jnädich, oo Gott, no diene Jnod: No diene groote Erboarmunk tilj miene Äwaträdungen!

⁴Wausch mie gaunz von miene Ojjerajchtichkjeit, un reinj mie von miene Sinden!

⁵Dan ekj kjan miene Äwaträdungen, un miene Sind es stendich ver mie.

⁶Jäajen die, jäajen die auleen ha ekj jesindicht, un ekj ha jedonen, waut bees es en diene Uagen; doamet du jerajchtfoadicht woascht, wan du rädst, rein jefungen, wan du rechst.

⁷Kjikj, en Ojjerajchtichkjeit sie ekj jebuaren, un en Sinden haft mie miene Mutta emfangen.

⁸Kjikj, du hast aun dee enere Woarheit Lost, un em Veborjnen woascht du mie Weisheit kjanen lieren.

⁹Entsidij mie met Iessopp, un ekj woa rein sennen; wausch mie, un ekj woa witta sennen aus Schnee.

¹⁰Lot mie Jubel un Freid hieren, soo woaren dee Jläda sikj freien, dee du veschloagen hast.

¹¹Vestopp dien Aunjesecht fa miene Sinden, un tilj miene aule Onjerajchtichkjeiten!

¹²Schauf en mie, Gott, een reinet Hoat, un moak en mienem Ennalichen eenen fausten Jeist!

¹³Vesteet mie nich von dienem Aunjesecht, un däm Jeist diene Heilichkjeit nemm nich von mie!

¹⁴Jeff mie wada de Freid aun dienem Heil, un met eenem welljem Jeist stett mie!

¹⁵Ekj well de Äwaträda diene Wäaj lieren, un de Sinda woaren no die trigjkomen.

¹⁶Rad mie vonne Blootschult, Gott, du Gott von mienem Heil, soo woat miene Tung jublen un veharlichen diene Jerajchtichkjeit.

¹⁷Har, moak miene Leppen op, un mien Mul woat dien Loff vekjindjen.

¹⁸Dan du hast kjeene Lost aun Schlachtopfa, sest wudd ekj dee jäwen; aun Brauntopfa hast du kjeen Wooljefaulen.

¹⁹De Opfa Gottes sent een jebroakna Jeist; een jebroaknet un veschloagnet Hoat woascht du, Gott, nich veachten.

²⁰Doo Zion Goodet en diene Gonst; bu de Mia Jerusalems.

²¹Dan woascht du Lost ha aun Opfa de Jerajchtichkjeit, aun Brauntopfa un Gaunzopfa; dan woat maun Bolles opfren opp dienem Aultoa.