Read De Bibel JHF Psalm 57 Bible Online

Psalm 57 - De Bibel JHF bible

Psalm 57

¹Däm Väasenja. «Vedoaw nich!» Von David, een Jedicht, aus hee ver Saul enne Heel rand.

²Sie mie jnädich, oo Gott, sie mie jnädich! Dan miene Seel nemt Tooflucht bie die, un ekj well Tooflucht nämen em Schauten von diene Flichten, bat daut Vedoawen vebie jetrocken es.

³Too Gott, däm Hechsten, well ekj roopen, nodäm Gott, dee daut fa mie vollbrinjt.

⁴Vom Himmel woat hee schekjen un mie raden; hee moakt dee toom Spott, dee no mie schnaupe. (Sela) Gott woat siene Jnod un siene Woarheit schekjen.

⁵Enne Medd unja Leiws es miene Seel, unja Flaumen Spieende ligj ekj, unja Menschenkjinja, dän äare Tänen Spiessen un Feilasch sent, un äare Tungen een schoapet Schwieet es.

⁶Erhäw die äwa de Himmel, oo Gott! Äwa de gaunze Ieed es diene Harlichkjeit!

⁷Een Nat ha see miene Schräd reed jemoakt, miene Seel bekjt sikj dol; eene Kul ha see fa mie jegroft, see sent en äare Medd nenn jefollen. (Sela)

⁸Faust {Ps.108,2-6} es mien Hoat, oo Gott, faust es mien Hoat! Ekj well sinjen un Psalmen sinjen.

⁹Woak opp, miene Seel (Iea) {Ps.7,6}! Woakt opp, Hoap un Zitta! Ekj well daut Morjenroot oppwakjen.

¹⁰Ekj well die lowen, Har, unja de Velkja, well die besinjen unja de Nazionen.

¹¹Dan groot bat toom Himmel es diene Jnod, un bat too de Wolkjen diene Woarheit.

¹²Erhäw die äwa de Himmel, oo Gott! Äwa de gaunze Ieed es diene Harlichkjeit!