Read De Bibel JHF Psalm 59 Bible Online

Psalm 59 - De Bibel JHF bible

Psalm 59

¹Däm Väasenja, «Vedoaw nich!» von David, een Jedicht, aus Saul schekjt, un sien Hus bewoakt, om am omtobrinjen.

²Moak mie frie von miene Fiend, mien Gott! Sat mie en Sechaheit ver dän, dee sikj jäajen mie opphäwen!

³Moak mie frie von dän, dee Fräfel doonen, un rad mie fa de Blootmensche!

⁴Dan kjikj, see luaren opp miene Seel; Stoakje saumlen sikj jäajen mie onen miene Äwaträdunk un onen miene Sinden, Har!

⁵Onen eene Schult von miena Sied ranen un moaken see sikj reed; woak opp, mie entjäajen, un kjikj!

⁶Jo, du, Har, Gott de Häaschoa, Gott Israels, woak opp, om aule Heiden heimtosäkjen! Sie kjeenem jnädich von de truloose Fräfla! (Sela)

⁷Oppenowent komen see trigj, jule aus de Hunj un gonen ome Staut.

⁸Kjikj, ut äarem Mul sprudle see Beeset väa, Schwieeta sent opp äare Leppen - dan: «Wäa hieet?»

⁹Du oba, Har woascht äwa an lachen, woascht aule Heiden vespotten.

¹⁰Miene Krauft, opp die well ekj achten; dan Gott es miene huage Burjch.

¹¹Mien Gott woat mie met siene Leew (Jnod) entjäajen komen; Gott woat mie miene Lost seenen loten aun miene Fiend.

¹²Moak an nich doot, doamet mien Volkj daut nich vejat; lot an omhäa erren derch diene Macht, un schmiet an dol, Har, ons Schilt!

¹³De Sind en äarem Mul es daut Wuat äara Leppen; soo lot an jefangen woaren en äarem Stolt un wäajen däm Flieekje un wäajen de Läajes, de see utspräakje!

¹⁴Moak een Enj em Oaja, moak een Enj, daut see nich mea sent, un erkjanen, daut Gott en Jakob harscht bat aun de Enj de Ieed! (Sela)

¹⁵Un aum Owent komen see trigj, jule aus de Hunj, un omkjreisen de Staut.

¹⁶See ranen omhäa no Speise; see äwanachten (gnorre), wan see uk nich saut sent.

¹⁷Oba ekj well sinjen von diene Macht, un Zemorjes bejublen diene Jnod; dan du best mie eene huage Burjch jewast un eene Tooflucht aum Dach miene Bedrenkjnis.

¹⁸Die, miene Krauft, well ekj Psalmen sinjen; dan Gott es miene huage Burjch, dee Gott - miene Jnod.