Read De Bibel JHF Psalm 62 Bible Online

Psalm 62 - De Bibel JHF bible

Psalm 62

¹Däm Väasenja. No Jedutun. Een Psalm von David.

²Blooss opp Gott vetrut stell miene Seel, von am kjemt miene Radunk.

³Blooss hee es mien Fels un miene Radunk, miene huage Burjch; ekj woa nich väl wanken.

⁴Woo lang well jie jäajen eenen Maun aunjriepen, jie aula am dolrieten aus eene äwahenjende Waunt, eene aunjestade Mia?

⁵See plonen blooss, am von siene Hecht too schmieten; see ha Wooljefaulen aun de Läajes; met äarem Mul säajnen see, un en äarem Ennalichen flieekjen see. (Sela)

⁶Blooss opp Gott vetrut stell miene Seel, dan von am kjemt miene Hopninj.

⁷Blooss hee es mien Fels un miene Radunk, miene huage Burjch; ekj woa nich wanken.

⁸Opp Gott rut mien Heil un miene Iea; de Fels miene Krauft, miene Tooflucht, es en Gott.

⁹Vetrut opp am aule Tiet, oo Volkj! Schedd jun Hoat ver am ut! Gott es onse Tooflucht. (Sela)

¹⁰Blooss Frodem sent de Menschensäns, Läajes de Mannasäns. Opp de Wichtschiew gonen see nohecht, see sent aula toop leichta aus een Frodem.

¹¹Vetrut nich opp Jewault, un sat nich iedle Hopninj opp Raup; wan daut Rikjtum waust, soo sat jun Hoat nich doaropp.

¹²Eenmol haft Gott jerät, twee Mol ha ekj dit jehieet, daut de Macht bie Gott es.

¹³Un dien, oo Har, es de Jnod; dan du vejeltst eenem jiedrem no sienem Woakj.