Read De Bibel JHF Psalm 63 Bible Online

Psalm 63 - De Bibel JHF bible

Psalm 63

¹Een Psalm von David, aus hee enne Wieste Juda wia.

²Gott, du best mien Gott (El)! Tiedich sieekj ekj die. Daut darscht miene Seel no die, mien Fleesch velangt no die en eenem drieejen un meedem Launt onen Wota -

³soo aus ekj die aunjeseenen ha em Heilichtum, om diene Macht un diene Harlichkjeit to seenen.

⁴Dan diene Jnod es bäta aus Läwen; miene Leppen woaren die riemen.

⁵Soo woa ekj die lowen en mienem Läwen, miene Henj opphäwen en dienen Nomen.

⁶Aus von Moakjs un Fat woat miene Seel saut woaren, un met jubelnde Leppen woat mien Mul die lowen,

⁷wan ekj aun die denkj opp mienem Loaga, äwa die senn enne Nachtwoak.

⁸Dan du best mie too eene Help jewast, un ekj woa jublen em Schauten diene Flichten.

⁹Miene Seel henjt aun die, diene Rajchte helt mie faust.

¹⁰Oba jane, dee no mienem Läwen trachten, om daut too vedoawen, woaren enne unjaschte Uaten de Ieed nengonen.

¹¹Maun woat an de Jewault vom Schwieet hanjäwen, Aundeel de Schakale woaren see sennen.

¹²Un de Kjennich woat sikj freien en Gott; riemen woat sikj jiedra, dee bie am schwieet; dan daut Mul de Läajesrädende woat vestopt woaren.