Read De Bibel JHF Psalm 64 Bible Online

Psalm 64 - De Bibel JHF bible

Psalm 64

¹Däm Väasenja. Een Psalm von David.

²Hea, Gott, miene Stemm en mienem Kloagen; vom Schrakj miene Fiend bewoa mien Läwen!

³Bewoa mie fa däm jeheemen Rot dee Iebel doonen, fa de Menj, dee Fräfel doonen,

⁴dee äare Tung jeschoapt ha aus een Schwieet, äa Feila aunjelajcht, bettret Wuat,

⁵om em Vestäakj opp däm Onschuldjen too scheeten: Plazlich scheeten see opp am un enjsten sikj nich.

⁶See stoakjen sikj en eene beese Sach; see räden doavon, Schlenjen too vestoppen; see sajen: «Wäa woat ons seenen?»

⁷See sennen fräfelhauft: «Wie ha daut foadich, de Plon es utjedocht!» Un eenem jiedrem sien Ennalichet un Hoat es deep.

⁸Oba Gott woat opp an scheeten - plazlich kjemt een Feila: Äare Wunden sent doa.

⁹Un see woaren toom Faul jebrocht, äare Tung kjemt äwa an; aula, dee an seenen, woaren däm Kopp schedren.

¹⁰Un aule Menschen woaren sikj ferchten un daut Doonen Gottes vekjindjen un sien Woakj beachten.

¹¹De Jerajchta woat sikj em Harn freien un bie am Tooflucht sieekjen; un aule von Hoaten Opprechtje woaren sikj riemen.