Read De Bibel JHF Psalm 66 Bible Online

Psalm 66 - De Bibel JHF bible

Psalm 66

¹Däm Väasenja. Een Leet, een Psalm. Jubelt Gott, de gaunze Ieed!

²Besinjt too Iea sienem Nomen, moakt harlich sienen Loff.

³Sajcht too Gott: Woo furchtboa sent diene Woakjen! Wäajen diene groote Macht doonen sikj unjadon diene Fiend met schmeichlen.

⁴Dee gaunze Ieed woat die aunbäden un die Psalmen sinjen; see woat dienen Nomen besinjen. (Sela)

⁵Komt un kjikjt de Woakjen Gottes; furchtboa es hee en sienem Doonen jäajen de Menschenkjinja.

⁶Hee vewaundelt daut Mäa en drieejet Launt, see jinjen too Foot derch däm Stroom; doa freid wie ons en am.

⁷Hee harscht eewich derch siene Macht; siene Uagen beoobachten de Velkja. Daut sikj de Wadaspanstje nich erhäwen. (Sela)

⁸Loft, jie Velkja, onsem Gott, un lot hieren de Stemm von sienem Riem;

⁹dee onse Seel aum läwen erhelt un nich toojeloten haft, daut onse Feet wanken!

¹⁰Dan du hast ons jeprooft, oo Gott, du hast ons jereinicht, aus maun Selwa reinicht.

¹¹Du hast ons em Nat jebrocht, hast eene drekjende Laust opp onse Hoften jelajcht.

¹²Du hast Menschen opp onse Kjap rieden loten; wie sent em Fia un em Wota jekomen, oba du hast ons rutjefieet toom Äwafluss.

¹³Ekj well met Brauntopfa en dien Hus nenn gonen, well die mien Vespräakjen betolen,

¹⁴nodäm sikj miene Leppen wiet opjemoakt ha, un dee mien Mul en miene Bedrenkjnis utjesproake haft.

¹⁵Brauntopfa von Mastfee well ekj die opfren met Rieekjastoff (Weiruak, seeta Ruak) von Bakj; Rinda met Bakj well ekj opfren. (Sela)

¹⁶Komt, hieet too, aula, dee jie Gott ferchten, un ekj well vetalen, waut hee aun miene Seel jedonen haft.

¹⁷No am roopt ekj met mienem Mul, un siene Erhäwung (Preisung) wia unja miene Tung.

¹⁸Wan ekj daut en mienem Hoaten opp Orrajcht aufjeseenen ha, soo haud de Har nich jehieet.

¹⁹Doch Gott haft jehieet, hee haft jemoakjt opp de Stemm en mienem Jebäd.

²⁰Jesäajent es Gott, dee mien Jebäd nich aufjewäsen haft, un siene Huld von mie nich aufjedreit haft.