Read De Bibel JHF Psalm 68 Bible Online

Psalm 68 - De Bibel JHF bible

Psalm 68

¹Däm Väasenja. Von David. Een Psalm, een Leet.

²Mucht Gott oppstonen! Daut siene Fiend sikj vestreien, un siene Haussa

³woascht du an vejoagen; aus Wauss vom Fia veschmelt, soo woaren de Gottloose omkomen ver däm Aunjesecht Gottes.

⁴Oba de Jerajchte woaren sikj freien, see woaren froo sennen ver däm Aunjesecht Gottes un en Freid jublen.

⁵Sinjt Gott, besinjt sienen Nomen! Moakt Bon däm, dee derch de Stapen foat, Jah es sien Nomen, un freit junt ver am!

⁶Een Voda de Weise un een Rechta de Wätfrues es Gott en siene heilje Wonunk.

⁷Een Gott dee Eensome en eenem Hus wonen lat, fieet Jefangne rut em Jlekj; oba de Wadaspanstje bliewen (wonen) em drieejen Launt.

⁸Gott, aus du utjinkjst ver dienem Volkj, aus du omhäa jinjst derch de Wieste, (Sela),

⁹doa bäbd de Ieed, - uk de Himmel schmelten ver Gott - jan Sinai ver Gott, däm Gott Israels {Rich.5,4.5}.

¹⁰Jenuach Räajen gootst du ut, oo Gott; dien Oawgoot - daut meed wia, du rechst daut opp.

¹¹Diene Schoa ha doabennen jewont; du sorjst en diene Jnod fa däm Oamen, oo Gott!

¹²De Har jeft daut Wuat; de Schoa de Freidensboote es groot.

¹³De Kjennichs de Häasch ranen, see ranen, un de Husbewonarin vedeelt dän Raup.

¹⁴Wan jie tweschen de Häaden ligjen, woa jie sennen aus Flichten von eene Duw, dee met Selwa äwatrocken sent, un äare Fadren met jreen jälem Golt.

¹⁵Wan de Aulmajchtja Kjennichs em Launt vestreit, woat et schneewitt oppem Zalmon {Ri.9,48}.

¹⁶De Boajch Baschan es een Boajch Gottes, een Boajch met väl Spetzen es de Boajch Baschan.

¹⁷Wuarom kjikj jie aufjenstich, jie väl spetzje Boaj, opp däm Boajch, opp däm Gott jewenscht (lost) haft too sienem Wonsett? Uk de Har woat doa selfst fa emma wonen.

¹⁸De Woages Gottes sent twee Mol 10 000, 1000-e un oba 1000-e; de Har es unja an: - Een Sinai aun Heilichkjeit.

¹⁹Du best enopp jefoaren enne Hecht, du hast de Jefangenschoft jefangen jefieet; du hast em Mensch Gowen emfangen, un selfst fa Wadaspanstje, doamet Jah, Gott, eene Wonunk haft.

²⁰Jesäajent es de Har! Dach fa Dach drajcht hee onse Laust; de Gott von onsem Heil. (Sela)

²¹Gott es ons een Gott de Radunge, un bie Gott, däm Harn, es de Utgank vom Doot.

²²Jewess, Gott woat daut Haupt siene Fiend veschmatre, dän äa Hoastrich, dee doa waundelt en siene Veschuldunge.

²³De Har säd: Ekj woa ut Baschan trigj brinjen, trigj brinjen ut däm deepen Mäa,

²⁴doamet du dienen Foot em Bloot bodst, un de Tung von diene Hunj vonne Fiend äa Deel ha.

²⁵See ha diene Jenj jeseenen, oo Gott, de Jenj von mienem Gott, mienem Kjennich em Heilichtum.

²⁶De Senja jinjen veropp, hinjaraun de Seidespäla, enne medd de Paukeschläaja Junkfrues:

²⁷«Preist Gott, däm Harn, enne Vesaumlungen, dee jie ut de Kjwal Israels sent!»

²⁸Doa sent Benjamin, de Jinjsta, jie Harscha, de Ferschten von Juda, äarem Schoa, de Ferschten Sebulon, de Ferschten Naftali.

²⁹Jeboden haft dien Gott diene Macht. Macht, oo Gott, waut du fa ons jewirkjt hast!

³⁰Om dienen Tempel en Jerusalem wellen - woaren Kjennichs die Jeschenkja brinjen.

³¹Schild vom Tia em Schelp, de Schoowa de Ossen met de Kjalwa de Velkja; hee woat sikj die unjadon moaken met Selwastekja. Vestrei de Velkja, dee aum Kjrich Lost ha!

³²De Groote ut Ägipten woaren komen; Ätiopien woat schwind siene Henj utstrakjen no Gott.

³³Jie Kjennichrikjs de Ieed, sinjt Gott, besinjt däm Harn, - (Sela),

³⁴dan, dee doa omhäa foat en de Himmel, dee Himmel de Väatiet! Kjikj, hee lat siene Stemm schaule, eene majchtje Stemm.

³⁵Jeft Gott de Macht! Siene Huachheit es äwa Israel un siene Macht enne Wolkjen.

³⁶Ferchtboa best du, Gott, ut dienem Heilichtum häa; dee Gott (El) Israels, hee es et, dee Macht un Krauft däm Volkj jeft. Jepreist (veharlicht) es Gott!