Read De Bibel JHF Psalm 69 Bible Online

Psalm 69 - De Bibel JHF bible

Psalm 69

¹Däm Väasenja, no Schoschanim. Von David.

²Rad mie, oo Gott, dan de Wota sent bat aun de Seel jekomen!

³Ekj sie em deepen Modd vesunken, un kjeen Grunt es doa; em deepen Wota sie ekj jekomen, un de Stroom äwaschwamt mie.

⁴Ekj sie meed vom Roopen, mien Hauls es entzindet; miene Uagen sent dieslich, vom luaren opp mienem Gott.

⁵Mea aus de Hoa opp mienem Haupt sent dee, dee onen Uasoak mie haussen; majchtich sent miene Vetilja, dee onen Grunt mie fiend sent; waut ekj nich jeraupt ha, mott ekj (betolen) trigj jäwen.

⁶Du, oo Gott, weetst om miene Noaheit, un mien Vegonen es die nich veborjen.

⁷Lot nich derch mie beschämt woaren, dee opp die hopen, Har, Gott de Häaschoa! Lot nich derch mie too Schaund woaren, dee die sieekjen, Gott Israels!

⁸Dan dient haulwen droag ekj Schmach, haft Schaund mien Aunjesecht bedakjt.

⁹Miene Breeda sie ekj framd jeworden, un de Säns miene Mutta sie ekj een Onbekaunda jeworden.

¹⁰Dan de Iewa om dien Hus haft mie vetäat, un de Veachtunge von dän, dee die veachten, sent opp mie jefollen.

¹¹Aus ekj hield, un miene Seel aum Fausten wia, doa wort ekj toom Spiet;

¹²aus ekj mie en Sackkjleet auntrock, doa wort ekj an toom Sprechwuat.

¹³Dee em Dooa setten, räden äwa mie, un ekj sie daut Seidenspell de Drinkja.

¹⁴Oba ekj, mien Jebäd es to die, Har, too aunjenämen Tiet. Oo Gott, no diene groote Jnod, erhia mie no de Woarheit von dienem Heil

¹⁵Rad mie ut däm Modd, daut ekj nich vesinkj! Lot mie jerat woaren von miene Haussa un ut däm deepem Wota.

¹⁶Lot de Wota Streem mie nich wajch speelen, un daut Deepe mie nich veschlinjen; un lot däm Borm nich äa Mul äwa mie veschluten.

¹⁷Auntwuad mie, Har dan goot es diene Jnod; drei die no mie no diene groote Erboarmungen.

¹⁸Un vestäakj dien Aunjesecht nich fa dienem Kjnajcht, dan ekj sie bedrenjt; auntwuad mie boolt!

¹⁹Noda die miene Seel, erlees äa; moak mie frie, om miene Fiend äat haulwen!

²⁰Du kjanst miene Schmach un miene Schaund un mien Spott; ver die sent aule miene Bedrenja.

²¹Schmach haft mien Hoat jebroaken, un ekj sie vetwiewelt; un ekj ha opp Metleet jehopt, un doa wia kjeent, un opp Treesta, un ekj ha kjeene jefungen.

²²Un see jeewen mie en mienem Äten Gaul, un en mienem Darscht drenjte see mie met Ädikj.

²³Äa Desch woat ver an too ne Schlenj, un an, de Sorjloose, too ne Faul!

²⁴Lot äare Uagen dunkel woaren, daut see nich seenen; un lot äare Hoften bestendich wanken!

²⁵Schedd dien Oaja äwa an ut, un de Gluaje von dienem Oaja errieekjt an!

²⁶Vewiest es äa Zeltloaga, en äare Zelten es kjeen Bewona!

²⁷Dan dee du jeschloagen hast, ha see vefolcht, un von de Weedoag diene Vewundne vetalen see.

²⁸Doo Schult too äare Schult, un lot an nich too diene Jerajchtichkjeit komen!

²⁹Lot an ut däm Läwensbuak utjelascht woaren un nich met de Jerajchte enjeschräwen woaren!

³⁰Oba ekj sie älent, un mie deit wee; dien Heil, oo Gott, sat mie en Sechaheit.

³¹Riemen well ekj däm Nomen Gottes em Leet, un am erhäwen (ieren) met Dank.

³²Un daut woat däm Harn wooljefaulja sennen aus een Boll, een junga Boll met Hieena un jespoolde Heefta.

³³De Saunftmootje woaren daut seenen, see woaren sikj freien; jie, dee jie Gott sieekjen, jun Hoat woat läwen!

³⁴Dan de Har hieet opp de Oame, un siene Jefangne veacht hee nich.

³⁵Am sellen lowen Himmel un Ieed, un Mäa un aules, waut sikj en an bewäacht!

³⁶Dan Gott woat Zion raden un Städa von Juda buen; un see woaren doa selfst wonen un dee besetten.

³⁷Un de Somen von siene Deena woaren daut oawen; un dee sienen Nomen leewen, woaren doabennen wonen.