Read De Bibel JHF Psalm 7 Bible Online

Psalm 7 - De Bibel JHF bible

Psalm 7

¹Een Kloagleet von David, daut hee däm Harn sung wäajen de Wieed Kusch, däm Benjaminita.

²Har, mien Gott, opp die vetru ekj; rad mie von aul miene Vefolja un rad mie (moak mie frie)!

³Daut hee miene Seel nich veritt aus een Leiw, dee veriten, un kjeen Rada es doa.

⁴Har, mien Gott! Wan ekj soowaut jedonen ha, wan Orrajcht en miene Henj es, -

⁵wan ekj Beeset vejelt däm, dee met mie en Fräd wia, - ha ekj doch däm jerat, dee mie onen Uasoak bedrenjt, -

⁶soo vefolcht de Fient miene Seel un hoolt äa en, un klunjt mien Läwen enne Ieed (Grunt) un strakjt miene Iea (Seel) en däm Stoff. (Sela)

⁷Sto opp, Har, en dienem Oaja! Erhäw die jäajen de Wutt miene Bedrenja, un woak opp - no mie: Jerecht hast du befoolen.

⁸Un de Schoowa (Jemeent) de Velkja woat die omrinjen; un äat haulwen komm wada no Hecht.

⁹De Har woat de Velkja rechten. Recht mie, Har, no miene Jerajchtichkjeit un no miene Oschult (Frommheit), dee bie mie es.

¹⁰Lot doch een Enj nämen de Boosheit de Gottloose, un moak däm Jerajchten faust! Daut prooft de Hoaten un Nieren dee jerajchta Gott.

¹¹Mien Schilt es bie Gott, dee, dee von Hoaten Opprechtje rad.

¹²Gott es een jerajchta Rechta, un een Gott, de jieda Dach oajalich (wuttent) es.

¹³Wan hee (de Gottloosa) nich omdreit, soo schoapt hee sien Schwieet; sienen Boagen haft hee jetrocken un am reed.

¹⁴Un Jereetschoft toom dootmoaken haft hee fa am reedjemoakt (opp am jerecht), siene Feilasch moakt hee brennent.

¹⁵Kjikjt, hee (de Gottloosa) es en Jeburtsweeen met Onheil; un schwanga met Mieej, un brinjt Faulschheit too Welt.

¹⁶Hee haft eene Kul jegroft un haft dee utjehollt, un hee es enne Kul jefollen, dee hee jemoakt haft.

¹⁷Sien Onjlekj (daut hee fa aundre reedmuak) woat trigjkomen opp sien Haupt, un opp sienen Schädel woat rauffaulen siene Jewault.

¹⁸Ekj well däm Harn danken no siene Jerajchtichkjeit, un besinjen däm Nomen Gottes, däm Hechsten.