Read De Bibel JHF Psalm 71 Bible Online

Psalm 71 - De Bibel JHF bible

Psalm 71

¹No die, Har, näm ekj Tooflucht: Lot mie niemols beschämt woaren!

²En diene Jerajchtichkjeit moak mie frie un rad mie! Neij dien Ua no mie un halp mie!

³Sie mie een Fels too Wonunk, nodäm ekj emma gonen kaun! Du hast toojesajcht, mie to raden, dan du best mien Fels un miene Burjch.

⁴Mien Gott, rad mie ut de Haunt de Gottloose, ut de Fust de Ojjerajchte un de Jewaultje!

⁵Dan du best miene Hopninj, Har, Gott; mien Toovetruen von miene Jugent aun.

⁶Opp die ha ekj mie jestett vom Muttaschoot aun, ut miene Mutta äa Lief hast du mie jetrocken; von die es mien Loffjesank.

⁷Fa väle sie ekj aus een Wunda; oba du best miene stoakje Tooflucht.

⁸Mien Mul es voll von dienem Riem, von diene Pracht däm gaunzen Dach.

⁹Vesteet mie nich en mienem Ella, biem veschwinjen miene Krauft velot mie nich.

¹⁰Dan miene Fiend ha von mie jerät, un dee opp miene Seel luaren, beroden metenaunda;

¹¹un see sajen: Gott haft am veloten; vefolcht un jriept am, dan kjeen Rada es doa!

¹²Gott, sie nich wiet von mie; mien Gott, spood die mie too halpen!

¹³Lot beschämt woaren, lot vegonen, dee jäajen miene Seel sent! Lot met Spott un Schaund bedakjt woaren, dee mien Onjlekj sieekjen!

¹⁴Oba ekj well emma hopen un aul dien Riem vemieren.

¹⁵Mien Mul saul diene Jerajchtichkjeit vekjindjen, däm gaunzen Dach diene Help; dan ekj weet nich äare Zol.

¹⁶Ekj woa met de Macht det Harn, Gottes, komen, woa jedenkjen aun diene Jerajchtichkjeit, aun die auleen.

¹⁷Gott, du hast mie jelieet von miene Jugent aun, un bat hiahäa ha ekj diene Wundawoakjen vekjindicht.

¹⁸Un bat em Ella un bat toom Jreisenella velot mie nich, oo Gott, bat ekj dienen Oarm däm komenden Jeschlajcht vekjindjen, aulen, dee komen woaren, diene Macht!

¹⁹Un diene Jerajchtichkjeit, oo Gott, rieekjt bat enne Hecht; du, dee du groote Dinj jedonen hast, oo Gott, wäa es aus du?

²⁰Du, dee du ons (mie) väl Bedrenkjnisen un Beeset hast seenen loten, du woascht ons wada beläwen un wada vom Ieedboddem enopp fieren.

²¹Du woascht mie Jrata moaken, un du woascht die dreien un mie treesten.

²²Uk ekj well die danken met de Hoap, jo, diene Woarheit, mien Gott! Ekj well die Psalmen sinjen met de Zitta, du Heilja Israels.

²³Jublen woaren miene Leppen, wan ekj die Psalmen sinj, un miene Seel, dee du erleest hast;

²⁴uk miene Tung woat von diene Jerajchtichkjeit räden däm gaunzen Dach; dan beschämt, dan met Schaund sent bedakjt worden, dee mien Onjlekj sieekjen.