Read De Bibel JHF Psalm 72 Bible Online

Psalm 72 - De Bibel JHF bible

Psalm 72

¹Fa Salomo. Oo Gott, jeff däm Kjennich diene Jerechten, un diene Jerajchtichkjeit däm Kjennichssän.

²Hee woat dien Volkj en Jerajchtichkjeit rechten, un diene Älendje nom Rajcht.

³De Boaj un de Aunboajch woaren däm Volkj derch Jerajchtichkjeit Fräd brinjen.

⁴Hee woat däm Älenden em Volkj Rajcht schaufen, hee woat de Kjinja de Oame raden, un däm Bedrekja woat hee veklunjen.

⁵See woaren die ferchten von Jeschlajcht too Jeschlajcht, soo lang de Sonn un Mon bestonen.

⁶Hee woat rauf komen aus Räajen oppe Wäs, aus een Näwelräajen, Gusräajen oppem Launt.

⁷En siene Doag woat de Jerajchta blieejen, un väl Freid woat sennen, bat de Mon nich mea es.

⁸Un hee woat harschen vom Mäa too Mäa, un vom Stroom bat aun de Enj de Ieed.

⁹Fa am woaren sikj bieejen de Bewona de Wieste, un siene Fiend woaren däm Stoff lekjen,

¹⁰de Kjennichs von Tarsus un vonne Inslen woaren Jeschenkja reed moaken, de Kjennichs von Schäba un Seba woaren Gowen doahan brinjen.

¹¹Un aule Kjennichs woaren ver am dolfaulen, aule Velkja am deenen.

¹²Dan hee woat däm Oamen raden, dee om Help roopt, un däm Älenden, dee kjeenen Helpa haft;

¹³hee woat sikj äwa däm Jerinjen un däm Oamen erboarmen, un de Seelen de Oame woat hee raden.

¹⁴Von Bedrekjung un Jewault woat hee äare Seelen erleesen, un äa Bloot woat dia en siene Uagen sennen.

¹⁵Un hee woat läwen, un vom Golt Schäba woat hee am jäwen; un hee woat emma fa am bäden, däm gaunzen Dach am säajnen.

¹⁶Daut woat Äwafluss aun Jeträajd em Launt sennen, oppe Boajchspetzen; aus oppem Libanon woat siene Frucht ruzhen; un see (de Menschen) woaren ut de Städa aus daut Krut ute Ieed väablieejen.

¹⁷Sien Nomen woat eewich sennen; soo lang de Sonn besteit, woat sien Nomen bestonen; un en am woat maun sikj säajnen; aule Velkja woaren am jlekjlich veharlichen.

¹⁸Jesäajent es de Har, Gott, de Gott Israels, dee Wunda deit, hee auleen!

¹⁹Un jepreist (jeloft) es sien harlicha Nomen en Eewichkjeit! Un de gaunze Ieed woat erfelt met siene Harlichkjeit! Amen, jo, Amen.

²⁰De Jebäda von David, däm Sän Isai, sent too Enj.