Read De Bibel JHF Psalm 73 Bible Online

Psalm 73 - De Bibel JHF bible

Psalm 73

¹Een Psalm. Von Asaf. Jewess, Gott es Israel goot, dän, dee een reinet Hoat haben.

²Oba ekj - weinich fäld, soo wieren miene Feet aufjegonen, om nuscht wieren miene Schräd utjejleppt.

³Dan ekj beneid de Äwamootje, aus ekj daut Gootgonen de Gottloose sach.

⁴Dan kjeene Kwol ha see bie äarem Doot, un jemast es äa Lief.

⁵See sent nich em Älent de Menschen, un met de Menschen woaren see nich jeploagt.

⁶Doarom omjäft an de Stolt aus eene Haulskjäd, met Jewault ha see sikj jekjleet.

⁷Äa Uag kjemt ut däm Fat väa; see doonen waut äarem Hoaten jefällt.

⁸See spotten un räden en Iebel von Bedrekjung; von bowen rauf räden see.

⁹See saten em Himmel äa Mul, un äare Tung waundelt opp de Ieed.

¹⁰Doarom dreit sikj sien Volkj hiahäa, un väl Wota woat von an jedrunken.

¹¹Un see sajen: Woo wist Gott daut, un woo saul de Hechsta Kjantnis doavon ha?

¹²Kjikj, dise sent Gottloose, un, emma sorjloos, see vemieren äa Vemäajen.

¹³Aulsoo, vejäfs ha ekj mien Hoat jereinicht, un en Oschult miene Henj jewoschen,

¹⁴doa ekj däm gaunzen Dach jeploagt wort un jieda Morjen miene Zuchtijung doa wia.

¹⁵Wan ekj jesajcht haud: Ekj well krakjt soo räden, kjikj, soo wia ekj ontru jewast däm Jeschlajcht diene Säns.

¹⁶Doa docht ekj no, om dit to bejriepen: Eene mäjvollen Oabeit wia daut en miene Uagen;

¹⁷bot ekj nenn jinkj enne Heilichtums Gottes (El) un acht jeef opp äa Enj.

¹⁸Jewess, opp glauten Grunt satst du an, du latst an en Teischunge faulen.

¹⁹Woo sent see soo platslich vewustet, ha een Enj jenomen, sent derch Schrakj omjekomen!

²⁰Aus een Droom nom Oppwakjen woascht du, Har, biem Oppwakjen äa Bilt veachten.

²¹Aus mien Hoat sikj vebettad un daut mie en miene Nieren stuak,

²²doa wia ekj domm un wist nich; een Tia wia ekj bie die.

²³Doch ekj sie emma bie die; du hast mie aun miene rajchte Haunt jefot;

²⁴derch dienen Rot woascht du mie leiden, un nohäa woascht du mie enne Harlichkjeit (met Iea) oppnämen.

²⁵Wäm ha ekj em Himmel? Un buta die ha ekj aun nuscht Lost oppe Ieed.

²⁶Mien Fleesch vejeit un mien Hoat - de Fels von mienem Hoat un mien Deel es Gott opp eewich.

²⁷Dan kjikj, daut woaren omkomen, dee die wiet auf sent; du vetiljst aule, dee ontru von die aufgonen.

²⁸Oba ekj, Gott dichtbie too komen es fa mie goot; ekj ha mien Toovetruen opp däm Harn, Gott, jesat, om diene aule Woakjen to vetalen.