Read De Bibel JHF Psalm 77 Bible Online

Psalm 77 - De Bibel JHF bible

Psalm 77

¹Däm Väasenja, fa Jedutun. Von Asaf, een Psalm.

²Miene Stemm es too Gott, un ekj well schrieen; miene Stemm roopt no Gott, un hee woat mie hieren.

³Aum Dach miene Noot sieekj ekj däm Harn; miene Haunt wia bie Nacht utjestrakjt un leet nich auf; miene Seel wäat sikj jetreest to woaren.

⁴Ekj docht aun Gott, un ekj ständ; ekj docht no, un mien Jeist wort meed. (Sela)

⁵Du helst faust miene Uageläd; ekj wia voll Onru un räd nich.

⁶Ekj derchdocht de oole Doag, de Joaren de Väatieden.

⁷Ekj docht aun mien Seidenspell, enne Nacht; ekj denkj en mienem Hoaten no, un mien Jeist forscht no.

⁸Woat de Har opp eewich vesteeten un wiedahan kjeene Jnod mea bewiesen?

⁹Es siene Huld fa emma too Enj? Haft daut Vespräakjen oppjehieet von Jeschlajcht too Jeschlajcht?

¹⁰Haft Gott (El) vejäten jnädich to sennen? Haft hee em Oaja veschloten siene Erboarmungen? (Sela)

¹¹Doa säd ekj: Daut es mien Krank sennen. Dee Joaren de Rajchte vom Hechsten -

¹²well ekj jedenkjen, dee Doten Jah; dan diene Wunda von oole Tieden häa well ekj jedenkjen;

¹³un ekj well nodenkjen äwa aul dien Doonen, un äwa diene Dot well ekj denkjen.

¹⁴Gott, dien Wajch es em Heilichtum! Wäa es een groota Gott aus Gott?

¹⁵Du best de Gott, dee Wunda deit, du hast diene Macht unja de Velkja bewäsen.

¹⁶Du hast dien Volkj erleest met jehownem Oarm, de Säns von Jakob un Josef. (Sela)

¹⁷Die sagen de Wota, oo Gott, die sagen de Wota; dee bäbde, jo, daut gruntloose Wota zettad.

¹⁸De Wolkjen gote Wota, de Wolkjen {Hi.35,5} leeten eene Stemm schaule, un diene Feilasch fuaren han un häa.

¹⁹De Stemm von dienem Donna wia em Wirbelwint, Blitz bedacht däm Ieedkjreis; daut zettad un bäbd de Ieed.

²⁰Em Mäa es dien Wajch, un diene Stiej en groote Wota, un diene Footstaupen sent nich bekaunt.

²¹Du hast dien Volkj jeleit aus eene Häad derch de Haunt Moses un Aaron.