Read De Bibel JHF Psalm 8 Bible Online

Psalm 8 - De Bibel JHF bible

Psalm 8

¹Däm Väasenja, opp de Gittith. Een Psalm von David.

²Gott, ons Har, woo Harlich es dien Nomen opp de gaunze Ieed, dee du diene Majestät jestalt hast äwa de Himmel!

³Ut däm Mul de Kjinja un Brostkjinja hast du Macht (Loff) jejrindet om diene Bedrenja wellen, om toom stellsennen to brinjen däm Fiend un däm Rachejiejen.

⁴Wan ekj dienen Himmel aunkjikj, diene Finja Woakj, dän Mon un de Stierns, dee du jemoakt hast:

⁵Waut es de Mensch, daut du aun am denkjst, un de Menschensän, daut du opp am achst?

⁶Dan du hast am een bat läaja unja de Enjel jesat; un met Iea (Harlichkjeit) un Schmuck (Pracht) hast du am jekjreent.

⁷Du hast am toom Harscha jemoakt äwa de Woakjen diene Henj; aules hast du unja siene Feet jestalt:

⁸Schop un Rinda aula toop un uk de Tieren oppe Stap,

⁹de Väajel em Himmel un de Fesch em Mäa, waut de Wäaj em Mäa derchwaundat.

¹⁰Gott, ons Har, woo Harlich es dien Nomen opp de gaunze Ieed!