Read De Bibel JHF Psalm 80 Bible Online

Psalm 80 - De Bibel JHF bible

Psalm 80

¹Däm Väasenja. No Leljen däm Zeichnis. Von Asaf. Een Psalm.

²Hoad Israels, nemm too Uaren, dee du Josef leidsd aus eene Häad, dee du troonst äwa de {1Chr.28,18; Hes.10,1} Cherubim, lot dienen Schien seenen!

³Ver Efraim un Benjamin un Manasse erwakj diene Krauft, un komm too onse Help.

⁴Oo Gott! Leid ons trigj, un lot dien Aunjesecht schienen, soo woa wie jerat woaren.

⁵Har, Gott de Häaschoa, woo lang rieekjat dien Oaja jäajen daut Jebäd von dienem Volkj?

⁶Du hast an met Broot von Tronen jespeist, un an motwies met Tronen jedrenkjt.

⁷Du hast ons toom Zank fa onse Nobasch jesat, un onse Fiend spotten unjarenaunda.

⁸Oo Gott de Häaschoa, leid ons trigj un lot dien Aunjesecht schienen, soo woa wie jerat woaren!

⁹Eenen Wienstock brochst du ut Ägipten, vedreefst Velkja un plauntst am.

¹⁰Du muakst Rum ver am, un hee schluach Wartlen un feld daut Launt;

¹¹de Boaj worden bedakjt von sienem Schauten, un siene Asta wieren aus Zeeda Gottes.

¹²Hee strakjt siene Asta ut bat aum Mäa, un bat aum Stroom han siene Auflaja.

¹³Wuarom hast du siene Mia doljeräten, soo daut se am aula beplekje, dee opp däm Wajch vebie gonen?

¹⁴Daut Wiltschwien utem Woolt veweeld am, un daut Wilt vom Flekj weid am auf.

¹⁵Gott de Häaschoa, komm doch wada! Kjikj vom Himmel un see, un nemm die disen Wienstock aun,

¹⁶un daut Jeplaunte, däm diene Rajchte jeplaunt haft, un däm Sän, däm du die jestoakjt hast!

¹⁷Hee es met Fia vebrent, hee es aufjeschnäden; von däm Schellen fa dienem Aunjesecht komen see om.

¹⁸Diene Haunt es opp däm Maun diene Rajchte, opp däm Menschensän, dän du die jestoakjt hast!

¹⁹Soo woa wie nich von die aufgonen; beläw ons, un wie woaren dienen Nomen aunroopen.

²⁰Har, Gott de Häaschoa, fia ons trigj! Lot dien Aunjesecht schienen, soo woa wie jerat woaren.