Read De Bibel JHF Psalm 84 Bible Online

Psalm 84 - De Bibel JHF bible

Psalm 84

¹Däm Väasenja. Opp de Gittith. Von de Säns Korah. Een Psalm.

²Woo leeftolich sent diene Woninj, Gott de Häaschoa!

³Miene Seel velangt un bangt sikj no de Väahäw Gottes; mien Hoat un mien Fleesch roopen lud nom läwendjen Gott.

⁴Soogoa de Spoalinkj haft een Hus jefungen, un de Schwaulm een Nast fa sikj, woa see äare Junge hanlajt; diene Aultoaren, Gott de Häaschoa, mien Kjennich un mien Gott!

⁵Jlekjseelich, dee doa en dienem Hus wonen! Dee woaren die emma Lowen. (Sela)

⁶Jlekjseelich de Mensch, däm siene Krauft en die es, en dee äare Hoaten jebonte Wäaj sent!

⁷Wan see derch de Tronenläacht (Jaumaläacht) gonen, moaken see daut to eenem Uat de Kjwal; jo, met Säajnungen bedakjt daut de tiedja Räajen.

⁸See gonen von Krauft too Krauft; see komen (erschienen) ver Gott en Zion.

⁹Har, Gott de Häaschoa, hia mien Jebäd; nemm too Uaren, du Jakob sien Gott! (Sela)

¹⁰Du, ons Schilt, kjikj, oo Gott; un kjikj aun daut Aunjesecht von dienem Jesaulwden!

¹¹Dan een Dach en diene Väahäw es bäta aus sest 1000; ekj well leewa aun de Schwal stonen em Hus von mienem Gott, aus wonen enne Zelten de Gottloose.

¹²Dan de Har, Gott, es Sonn un Schilt; Jnod un Harlichkjeit woat de Har jäwen, dän nuscht Goodet trigj hoolen, dee en Reinheit waundlen.

¹³Dee Gott de Häaschoa! Jlekjseelich dee Mensch, dee opp die vetrut!