Read De Bibel JHF Psalm 85 Bible Online

Psalm 85 - De Bibel JHF bible

Psalm 85

¹Däm Väasenja. Von de Säns Korah. Een Psalm.

²Har, du hast dienem Launt Jnod erwäsen, hast Jakob siene Jefangenschoft jedreit;

³du hast de Ojjerajchtichkjeit von dienem Volkj vezeit, aule äare Sinden hast du toojedakjt. (Sela)

⁴Du hast aul dien Oaja trigj jetrocken, hast die aufjedreit von dienem jläjendem Oaja.

⁵Brinj ons trigj, Gott, ons Heil, un moak dienem Onwellen jäajen ons een Enj!

⁶West du die eewich jäajen ons oajren? West du dienen Oaja sennen loten von Jeschlajcht too Jeschlajcht?

⁷West du ons nich wada beläwen, daut dien Volkj sikj en die freien kaun?

⁸Lot ons, Har, dien Goodet seenen, un dien Heil schenkj ons!

⁹Hieren well ekj, waut Gott (El), de Har, räden woat; dan Fräd woat hee räden too sienem Volkj un to siene Fromme, - blooss daut see nich no de Noaheit trigjgonen!

¹⁰Jewess, dicht bie es sien Heil (Help) dän, dee am ferchten, doamet de Harlichkjeit en onsem Launt wont.

¹¹Jnod un Woarheit sent sikj bejäajent, Jerajchtichkjeit un Fräd ha sikj jekusst.

¹²Woarheit woat waussen ute Ieed, un Jerajchtichkjeit vom Himmel raufkjikjen.

¹³Uk de Har woat daut goode jäwen, un ons Launt woat siene Arnt jäwen.

¹⁴De Jerajchtichkjeit woat ver am omhäa gonen un äare Schräd too siene Wäaj moaken.