Read De Bibel JHF Psalm 86 Bible Online

Psalm 86 - De Bibel JHF bible

Psalm 86

¹Een Jebäd. Von David. Neaj, Har, dien Ua! Erhia mie, dan ekj sie älent un oam!

²Bewoa miene Seel, dan ekj sie fromm; rad du, mien Gott, dienen Kjnajcht, dee opp die vetrut!

³Sie mie jnädich, Har, dan no die roop ekj däm gaunzen Dach!

⁴Moak de Seel von dienem Kjnajcht froo! Dan no die, Har, erhäw ekj miene Seel!

⁵Dan du, Har, best goot un toom Vejäwen reed, un groot aun Jnod jäajen aule, dee die aunroopen.

⁶Nemm too Uaren, Har mien Jebäd, un horch oppe Stemm en miene Bedd!

⁷Aum Dach miene Noot woa ekj die aunroopen, dan du woascht mie erhieren.

⁸Kjeena es aus du, Har, unja de Jetta, un nuscht es diene Woakjen to vejlikjen.

⁹Aule Velkja, dee du jemoakt hast, woaren komen un ver die aunbäden, Har, un dienen Nomen veharlichen (ieren).

¹⁰Dan du best groot un deist Wunda, du best Gott, du auleen.

¹¹Lia mie, Har, dienen Wajch: Ekj woa en diene Woarheit waundlen; neij mien Hoat dienen Nomen too ferchten.

¹²Ekj well die danken, Har, mien Gott, met mienem gaunzem Hoaten, un dienen Nomen eewich veharlichen.

¹³Dan diene Jnod es groot jäajen mie, un du hast miene Seel utem unjaschtem Scheol jerat.

¹⁴Gott, Frajche sent jäajen mie oppjestonen, un de Jewault doonende Schoa tracht no mienem Läwen! Un see ha die nich ver sikj jestalt.

¹⁵Oba du, Har, best een Gott (El), boarmhoatich un jnädich, langsom toom Oaja un groot aun Jnod un Woarheit.

¹⁶Drei die no mie un sie mie jnädich! Jeff dienem Kjnajcht diene Krauft un rad däm Sän von diene Deenstmejal!

¹⁷Erwies mie een Tieekjen toom Goodem, daut miene Haussa daut seenen un beschämt woaren, wiels du, Har, mie jeholpen un mie jetreestet hast.