Read De Bibel JHF Psalm 88 Bible Online

Psalm 88 - De Bibel JHF bible

Psalm 88

¹Een Psalmleet. Von de Säns Korah. Däm Väasenja, no Machalat Leanot. Een Maskil. Von Heman, däm Esrachita.

²Har, Gott von mienem Heil, ekj schrieech Dach un Nacht ver die.

³Mucht mien Jebäd ver die komen! Neij dien Ua no mienem Schrieen!

⁴Dan miene Seel es saut vom Lieden, un mien Läwen es dicht aum Scheol.

⁵Ekj sie to dän jeacht dee enne Kul vesinkjen; ekj sie aus een Maun, dee kjeene Krauft haft;

⁶unja de Doodes hanjestrakjt, aus dootjeschloagne, dee em Grauf ligjen, aun dee du nich mea denkjst; dan see sent von diene Haunt aufjeschnäden.

⁷Du hast mie enne deepste Kul jelajcht, en Diestanis, em Deepen.

⁸Dien Oaja licht schwoa opp mie, un met aule diene Walle hast du mie doljedrekjt. (Sela)

⁹Miene Bekaunde hast du von mie wajchjenomen, hast mie ver an toom Aufschu jemoakt; ekj sie enjeschloten un kaun nich rutkomen.

¹⁰Mien Uag es veschmacht fa Älent; no die, Har, ha ekj jieda Dach jeroopen, no die ha ekj miene Henj utjestrakjt.

¹¹Woascht du aun de Doodje Wunda doonen? Ooda woaren de Schautes (Jestorwnen) oppstonen, die too lowenn? (Sela)

¹²Woat diene Jnod em Grauf vetalt woaren, em Aufgrunt diene True? {Hi.26,6; 28,22; Opb.9,11}

¹³Woaren enne Diestanis diene Wunda bekaunt woaren, un diene Jerajchtichkjeit en däm Launt de Vejätenheit?

¹⁴Oba ekj, Har, schrie no die, un Zemorjes kjemt mien Jebäd ver die.

¹⁵Wuarom, Har, vestatst du miene Seel, vestakjst dien Aunjesecht fa mie?

¹⁶Ekj sie älent un vejenkjlich von miene Jugent aun; ekj droag dien Schrakj, un sie rotloos.

¹⁷Diene Zorngloot es äwa mie jegonen, dien Schrakj haft mie venicht.

¹⁸See ha mie omrinjt aus Wota däm gaunzen Dach, see ha mie aula toop omjäwen.

¹⁹Frind un Jenosse hast du von mie jenomen; miene Bekaunde sent Diestanis.