Read De Bibel JHF Psalm 90 Bible Online

Psalm 90 - De Bibel JHF bible

Psalm 90

¹Een Jebäd von Moses, däm Maun Gottes. Har, du best onse Wonunk jewast von Jeschlajcht too Jeschlajcht.

²Iea de Boaj jebuaren worden, un du de Ieed un dän Ieedkjreis erschaufen (jebuaren) hautst - jo, von Eewichkjeit too Eewichkjeit best du Gott.

³Du latst däm Mensch toom Stoff trigjgonen, un sajchst: Komt trigj, jie Menschenkjinja!

⁴Dan 1000 Joa sent en diene Uagen aus de jistasche Dach, wan hee vegonen es, un aus eene Nachtwoak.

⁵Du schwamst an wajch, see sent aus een Schlop, Zemorjes aus Grauss, daut utlat;

⁶Zemorjes bläjt daut un waust; oppenowent woat daut walkj un vedrieecht.

⁷Dan wie vegonen derch dienen Oaja, un derch dienen Jrim woa wie beenjst.

⁸Du hast onse Onjerajchtichkjeiten ver die jestalt, ons jeheemet Doonen ver daut Licht von dienem Aunjesecht.

⁹Dan aule onse Doag veschwinjen derch dienen Oaja, wie brinjen onse Joaren too aus een Vesefze (Jedanken).

¹⁰De Doag - onse Joaren, - daut sent 70 Joa, un wan en Krauft (huach) 80 Joa, un äa Stolt es Mieej un nuschtich, dan schwind ielt daut vebie, un wie flieejen doahan.

¹¹Wäa erkjant de Krauft von dienem Oaja, un, diene Forcht jemäss, dienem Jrim?

¹²Soo lia ons dan onse Doag too talen, om daut wie een weiset Hoat erlangen!

¹³Komm wada, Har! - Woo lang? - Un erboarm die äwa diene Kjnajchts!

¹⁴Moak ons Zemorjes saut met diene Jnod, soo woa wie jublen un ons freien en aule onse Doag.

¹⁵Moak ons no dee Doag froo, doa du ons jeboagen hast, no dee Joaren, doa wie Iebel jeseenen ha.

¹⁶Lot diene Kjnajchts seenen dien Doonen, un diene Majestät äare Säns!

¹⁷Un de Huld vom Harn, onsem Gott, es äwa ons! Un moak faust äwa ons daut Woakj von onse Henj; jo, daut Woakj von onse Henj, moak daut faust!