Read De Bibel JHF Psalm 92 Bible Online

Psalm 92 - De Bibel JHF bible

Psalm 92

¹Een Psalm, een Leet. Fa däm Sabatdach.

²Daut es goot, däm Harn too danken, un Psalmen too sinjen dienem Nomen, oo Hechsta!

³Zemorjes too vekjindjen diene Jnod, un de Nacht diene Tru,

⁴oppe 10-seidje un oppe Hoap, toom seidespäl met de Zitta!

⁵Dan du hast mie froo jemoakt, Har, derch dien Doonen; äwa de Woakjen diene Henj well ekj jublen.

⁶Woo groot sent diene Woakjen, Har! Sea deep sent diene Jedanken.

⁷Een onveninftja Mensch erkjant daut nich, un een Noa vesteit soowaut nich.

⁸Wan de Gottloose utloten aus Grauss, un aula, dee Iebel doonen, blieejen, soo passieet daut, doamet see vetilcht woaren fa emma.

⁹Oba du best de Hechsta (huach bowen) opp eewich, Har!

¹⁰Dan kjikj, diene Fiend, Har, dan kjikj, diene Fiend woaren omkomen; daut woaren vestreit woaren aule, dee Iebel doonen.

¹¹Oba du woascht mien Huarn opphäwen aus von eenem Beffel; met freschem Eelj woa ekj äwajegote woaren.

¹²Un mien Uag woat siene Lost seenen aun miene Fiend, miene Uaren woaren äare Lost hieren aun de Iebel doonende, dee jäajen mie oppstonen.

¹³De Jerajchta woat utloten aus de Palmboom; aus eene Zeeda opp däm Libanon woat hee waussen.

¹⁴Dee jeplaunt sent en däm Hus Gottes woaren blieejen enne Väahäw von onsem Gott.

¹⁵Noch em Jreisenella sent see Fruchtboa, sent sauftvoll un jreen,

¹⁶om to vekjindjen, daut de Har jerajcht es. Hee es mien Fels, un kjeen Orrajcht es en am.