Read De Bibel JHF Psalm 94 Bible Online

Psalm 94 - De Bibel JHF bible

Psalm 94

¹Gott (El) de Rach, Har, Gott de Rach, komm väa!

²Erhäw die, Rechta de Ieed, vejelt de Stolte äa Doonen!

³Woo lang woaren de Gottloose, Har, woo lang woaren de Gottloose jublen,

⁴woaren väasprudle, Frajchet räden, aule sikj riemen, dee Iebel doonen?

⁵Dien Volkj, Har, veklunjen un dien Oawgoot bedrekjen see.

⁶See brinjen de Wätfrues un de Framde om, un see morden de Weise.

⁷Un sajen: Jah sitt daut nich, un Jakob sien Gott moakjt daut nich.

⁸Nämt Ensecht, jie Onveninftje unjrem Volkj! Un jie Noaren, wanea woa jie vestendich woaren?

⁹Dee daut Ua jeplaunt haft, sull hee nich hieren? Dee daut Uag jebilt, sull hee nich seenen?

¹⁰Dee de Velkja trajchtwiest, sull hee nich strofen, hee, dee de Menschen Erkjantnis leaat?

¹¹De Har kjant de Jedanken von Menschen, daut see een Frodem (Iedel) sent.

¹²Jlekjseelich dee Maun, däm du strofst, Har, un däm du belieescht ut dienem Jesaz,

¹³om am Ru to jäwen ver de beese Doag, bot däm Gottloosen de Kul jegroft woat!

¹⁴Dan de Har woat sien Volkj nich vesteeten, un sien Oawgoot nich veloten;

¹⁵dan too Jerajchtichkjeit woat daut Jerecht trigj fieren, un aule von Hoaten Opprechtje woaren am foljen.

¹⁶Wäa woat fa mie oppstonen jäajen de bees Jesennte? Wäa woat fa mie oppstonen jäajen dee, dee Iebel doonen?

¹⁷Wia nich de Har mie eene Help jewast, weinich fäld, soo haud miene Seel em stellen Launt jewont.

¹⁸Wan ekj säd: Mien Foot wankt, soo unjastett mie diene Jnod, Har.

¹⁹Bie miene väle Sorjen, en mienem Ennalichen, dien Troost erfelt miene Seel.

²⁰Sull met die veeent sennen de Troon det Vedoawnis, dee ut Orrajcht een Jesaz moakt?

²¹See drinjen nenn opp de Seel de Jerajchte, un onschuldjet Bloot veuadeelen see.

²²Doch de Har es miene huage Fastinj, un mien Gott de Fels miene Tooflucht.

²³Un hee lat äare Ojjerajchtichkjeit opp an trigjkomen, un derch äare Boosheit woat hee an vetiljen; vetiljen woat an de Har, ons Gott.