Read De Bibel JHF Spricha 13 Bible Online

Spricha 13 - De Bibel JHF bible

Spricha 13

¹Een weisa Sän hieet opp de Zucht vom Voda, oba een Spata hieet nich opp daut Schellen.

²Von de Frucht ut sienem Mul at een Maun Goodet, oba de Seel de Truloose es Jewault doonend.

³Wäa sien Mul bewoat, schoont siene Seel; wäa siene Leppen oprit, däm woatet toom Unjagank.

⁴Däm Fulen siene Seel jankat, un nuscht es doa; oba de Seel de Pienje woat sea jesäajent.

⁵De Jerajchta haust Läajesräden, oba de Gottloosa haundelt schentlich un spottisch.

⁶De Jerajchtichkjeit bewoat däm Vollkomnen oppem Wajch, un Gottloosichkjeit dreit däm Sinda om.

⁷Doa es eena, dee sikj rikj hanstalt un haft goa nuscht, un eena, dee sikj oam hanstalt un haft väl Vemäajen.

⁸Leesjelt fa daut Läwen von eenem Maun es sien Rikjtum, oba de Oama hieet kjeen Dreiwen.

⁹Daut Licht de Jerajchte brent froo, oba de Laump de Gottloose woat utjelascht.

¹⁰Derch Äwamoot jeft daut blooss Striet; däm oba, dee sikj roden lat, Weisheit.

¹¹Vemäajen, daut opp onjerajchte Wies jewonnen es, vekjlandat sikj; oba wäa aulmäajlich saumelt, vemieet daut.

¹²Lang hanjetrockne Hopninj moakt daut Hoat krank, oba een erfällta Wensch es een Läwensboom.

¹³Wäa daut Wuat veacht, woat von am tonicht jemoakt; oba wäa daut Jeboot fercht, däm woat vejelt woaren.

¹⁴De Belierunk de Weise es eene Läwenskjwal, om däm Faulstrank vom Doot too entgonen.

¹⁵Goode Ensecht veschauft Gonst, oba de Truloose äa Wajch es hoat.

¹⁶Jiedra Kluaka haundelt met Erkjantnis; oba een Noa vebreet Noaheit.

¹⁷Een gottloosa Bootschofta felt em Onjlekj, oba een trua Jeschekjta es Jesuntheit.

¹⁸Oamoot un Schaund däm, dee Zucht veacht; oba wäa Zucht beacht, woat jeieet.

¹⁹Een erfelldet Velangen es de Seel seet, un däm Noa es daut een Groll, vom Beesen wajchtogonen.

²⁰Wäa met Weise omjeit, woat weis; oba wäa sikj to de Noaren jesellt, woat schlajcht.

²¹Daut Beese vefolcht de Sinda, oba däm Jerajchten woat maun met gooden vejelten.

²²De Gooda veoaft opp Kjinja äare Kjinja, oba daut Rikjtum de Sinda es oppbewoat fa däm Jerajchten.

²³De Niebroak de Oame jeft väl Speise, oba maunch eena jeit too Grunt derch Orrajcht.

²⁴Wäa siene Wäd spoat, haust sienen Sän, oba wäa am leew haft, stroft am tiedich jenuach (von kjlien opp).

²⁵De Jerajchta at bat siene Seel saut es, oba de Lief de Gottloose mot lieden.