Read De Bibel JHF Spricha 22 Bible Online

Spricha 22 - De Bibel JHF bible

Spricha 22

¹Een gooda Nomen es wieetvolla aus grootet Rikjtum, Leeftol bäta aus Selwa un Golt.

²Rikje un Oame bejäajnen sikj: De Har haft dee aula jemoakt.

³De Kluaka sitt daut Onjlekj un vestakjt sikj; oba de Eenfeltje gonen Stroofliedent wieda.

⁴De Folj de Deemoot, un de Forcht Gottes, es Rikjtum un Iea un Läwen.

⁵Stachel un Schlenjen sent opp däm Wajch de Vekjieede; wäa siene Seel bewoat, helt sikj wietauf von an.

⁶Ertrakj däm Bocha (kjlienen Jung) opp sienem Wajch; hee woat nich doavon gonen, uk nich wan hee oolt woat.

⁷De Rikja harscht äwa däm Oamen, un de Lieenda es een Kjnajcht vom Lieenden.

⁸Wäa Orrajcht seit, woat Onheil arnten, un siene Oajawäd woat een Enj nämen.

⁹Wäa een gootmeenendet Uag haft, dee woat jesäajent woaren; dan hee jeft von sienem Broot däm Oamen.

¹⁰Joag eenem Spata wajch, soo jeit de Zank rut, un Striet un Schaund hieren opp.

¹¹Wäa een reinet Hoat leeft, un däm siene Leppen leeftolich sent, däm sien Frint es de Kjennich.

¹²Uagen Gottes bewoaren de Erkjantnis, un hee vedreit de Wieed de Truloose.

¹³De Fula sajcht: Een Leiw es buten; ekj kaun omjebrocht woaren medden oppe Gaussen!

¹⁴Daut Mul framde Frues es een deepet Loch; wäm de Har strofen well, dee felt nenn.

¹⁵Noaheit es jebungen aun daut Hoat de Junges; de Zuchtwäd woat an doavon aufhoolen.

¹⁶Wäa däm Oamen bedrekjt, daut es om am Rikj too moaken; wäa däm Rikjen jeft, daut es blooss toom Mangel.

¹⁷Neij dien Ua un hia de Wieed de Weise, un recht dien Hoat opp mien Weete!

¹⁸Dan leeftolich es daut, wan du dee en dienem Ennalichen bewoascht; muchten dee aulemol opp diene Leppen Bestaund ha!

¹⁹Doamet dien Vetruen oppem Harn es, belia ekj die vondoag, jo die, belieet.

²⁰Ha ekj die nich Vetraflichet oppjeschräwen aun Rotschläaj un Erkjantnis,

²¹om die to wiesen de Rajchtschnooa, de Wieed de Woarheit: Doamet du dän, dee die schekjen, Wieed trigj brinjst, dee de Woarheit sent?

²²Beroow nich däm Oamen, wiels hee oam es, un unjadrekj nich däm Älenden em Dooa.

²³Dan de Har woat äare Rajchtsache fieren, un äare Beroowa daut Läwen beroowen.

²⁴Lot die nich en met eenem Oajalichen, un go nich om met eenem hetzjen Maun,

²⁵doamet du siene Stiej nich lieescht un eenen Faulstrank doavon drajchst fa diene Seel.

²⁶Sie nich unja dän, dee enne Haunt ennschlonen, unja dän, dee fa Schulde birje.

²⁷Wan du nich hast, om to betolen, wuarom saul hee dien Bad unja die wajchnäme?

²⁸Veschuw nich de oole Jrensen, dee diene Vodasch jemoakt ha.

²⁹Sitst du eenen Maun, dee en sienem Jeschaft jeschekjt es - ver Kjennichs woat hee stonen, hee woat nich ver Onbediedende stonen.